ഗുജറാത്തിൽ പൂർണമായും ചാണകം ഉപയോഗിച്ച് സിഎൻജി ഉത്പാദനം; ചിത്രങ്ങളുമായി മന്ത്രി ചിഞ്ചു റാണി

ഗുജറാത്തിലെ ബനാസ് ഡയറി സന്ദർശിച്ച ചിത്രങ്ങൾ സോഷ്യൽമീഡിയിയൽ പങ്കുവെച്ച് മന്ത്രി ചിഞ്ചുറാണി. കേരളത്തിൽ നിന്നുള്ള ഉന്നതതല സംഘത്തോടൊപ്പമാണ് മന്ത്രി ഗുജറാത്തിലെ ദേശീയ ക്ഷീര വികസനബോർഡ് ആസ്ഥാനം സന്ദർശിച്ചത്. ദേശീയ ക്ഷീര വികസനബോർഡ് ചെയർമാൻ മീനേഷ് ഷായുമായുള്ള കൂടിക്കാഴ്ച്ചയിൽ നിരവധി പദ്ധതികളിൽ ധാരണയായതായി മന്ത്രി ഫെയ്സ്ബുക്കിൽ കുറിച്ചു.

കേരളത്തിലെ പശുക്കളുടെ ഉത്പാദനക്ഷമ ഉയർത്താനായി ലിംഗനിർണയം നടത്തിയ ബീജത്തിന്റെ ഉപയോഗം കേരളത്തിൽ വ്യാപിപ്പിക്കുന്നത്, കോഴിക്കോട് ഡോ. വർഗീസ് കുര്യൻ സ്മാരക മ്യൂസിയം സ്ഥാപിക്കുന്നത്, ഗുജറാത്തിൽ വിജയകരമായി നടപ്പിലാക്കിവരുന്ന ചാണക സംസ്കരണത്തിന്റെ പൈലറ്റ് പദ്ധതി കേരളത്തിൽ തുടങ്ങുന്നത്, പാലിലെ അഫ്ലാടോക്സിൻ ഉൾപ്പെടെയുള്ള ഗുണനിലവാര പ്രശ്നങ്ങൾ പരിഹരിക്കുന്നത്,

പശുക്കളിലെ ഭ്രൂണമാറ്റ സാങ്കേതികവിദ്യ കേരളത്തിൽ വ്യാപിപ്പിക്കുന്നത്, കൊല്ലം ജില്ലയിൽ ഒരു ആധുനിക ഡയറി പ്ലാന്റ് സ്ഥാപിക്കുന്നത്, കേരള സർക്കാരിന്റെ കന്നുകാലി വികസന ബോർഡിന്റെ വിവിധ പദ്ധതികളുമായി ദേശീയ ക്ഷീര വികസന ബോർഡ് യോജിച്ചു പ്രവർത്തിക്കുന്നത്, തുടങ്ങിയ വിവിധ വിഷയങ്ങളിൽ ദേശീയ ക്ഷീരവികസന ബോർഡ് ചെയർമാനുമായി നടത്തിയ ചർച്ചയിൽ ധാരണയായി.

ഗുജറാത്തിലെ ബനാസ് ഡയറിയുടെ സി എൻ ജി പ്ലാന്റ് സന്ദർശനത്തിൽ കർഷകരുടെ വീടുകളിൽ നിന്ന് ചാണകം വാങ്ങി പ്ലാന്റിൽ എത്തിക്കുകയാണ് ചെയ്യുന്നതെന്നും ഇതുവഴി കർഷകർക്ക് അധിക വരുമാനം ലഭിക്കുന്നുവെന്ന് മന്ത്രി ചൂണ്ടിക്കാട്ടി.

പൂർണമായും ചാണകം മാത്രം ഉപയോഗിച്ച് വാണിജ്യ അടിസ്ഥാനത്തിലുള്ള സിഎൻജി ഉൽപ്പാദനമാണ് ഇവിടെ നടക്കുന്നത്. പ്രതിദിനം 40 ടൺ ചാണകത്തിൽ നിന്ന് 800 കിലോ ഗ്യാസ് ഉൽപ്പാദിപ്പിക്കുന്നുവെന്ന് മന്ത്രി വ്യക്തമാക്കി. ഉപ ഉൽപ്പന്നങ്ങളായി ഓർഗാനിക് വളവും ഉണ്ടാക്കുന്നു.

കേരളത്തിൽ അയ്യങ്കാളി തൊഴിലുറപ്പ് പദ്ധതിയിൽ ക്ഷീരകർഷകർക്ക് 100 തൊഴിൽ ദിനം നൽകുന്ന മാതൃകയിൽ കേന്ദ്രസർക്കാരിനെ കൊണ്ട് തൊഴിലുറപ്പ് പദ്ധതിയിലും ക്ഷീര കർഷകരെ ഉൾപ്പെടുത്തിക്കാൻ വേണ്ട ഇടപെടൽ നടത്താമെന്നും ചെയർമാൻ ഉറപ്പ് നൽകിയതായും മന്ത്രി അറിയിച്ചു.

കേരളത്തിന്റെ വകുപ്പ് സെക്രട്ടറി ശ്രീ പ്രണബ് ജ്യോതിനാഥ് ഐഎഎസ്, മിൽമ ചെയർമാൻ കെ എസ് മണി, തിരുവനന്തപുരം മേഖലാ യൂണിയൻ കൺവീനർ ശ്രീ. ഭാസുരാംഗൻ, ദേശീയ ക്ഷീര വികസന ബോർഡ് ഉദ്യോഗസ്ഥർ തുടങ്ങിയവർ യോഗത്തിൽ പങ്കെടുത്തു.