നാസര്‍ ഫൈസി കൂടത്തായ് ഒറ്റയ്ക്കല്ല; ബിജെപിയുടെ സമ്പർക്കത്തിൽ വീണ പ്രമുഖര്‍ വേറെയുമുണ്ട്

കോഴിക്കോട്: പൗരത്വഭേദഗതി നിയമത്തിനെതിരെ പ്രക്ഷോഭത്തിനിറങ്ങുന്ന സംഘടനകളുടെ നേതാക്കള്‍ തന്നെ ബിജെപിയുടെ ക്യാമ്പയിനിന്‍റെ ഭാഗമായി മാറിയത് വിവാദമായി. പൗരത്വ ഭേദഗതി നിയമത്തിന് പിന്തുണ തേടിയുള്ള വീട് കയറിയുള്ള ജനസമ്പര്‍ക്ക പരിപായില്‍ പങ്കെടുത്തതിന് സമസ്ത ഇകെ വിഭാഗം നേതാവ് നാസര്‍ ഫൈസി കൂടത്തായിയെ സംഘടനയുടെ ഔദ്യോഗിക സ്ഥാനങ്ങളില്‍ നിന്നെല്ലാം പുറത്താക്കിയിരുന്നു. എന്നാല്‍ അദേഹം മാത്രമല്ല ബിജെപിയുടെ സമ്പർക്ക പരിപാടിയിൽ പങ്കെടുത്ത് വിവാദത്തിലായത്.

കൊടുവള്ളി എംഎല്‍എ കാരാട്ട് റസാഖാണ് മറ്റൊരു പ്രമുഖന്‍. എല്‍ഡിഎഫിലെ ഒരു എംഎല്‍എയെ ജനസമ്പര്‍ക്ക പരിപാടിയില്‍ സഹകരിപ്പിക്കാന്‍ ബിജെപിക്ക് കഴിഞ്ഞുവെന്നതാണ് കൗതുകരം. പോത്തന്‍കോട് മുസ്ലിം ജമാഅത്ത് ചീഫ് ഇമാം മീരാന്‍ ബാഖഫിയെയും ബിജെപി ജനസമ്പര്‍ക്കത്തില്‍ സഹകരിപ്പിച്ചു.

കാരാട്ട് റസാഖ് എംഎല്‍എയ്‌ക്കെതിരെ പരസ്യമായി എഐവൈഎഫ് രംഗത്ത് വന്നിട്ടുണ്ട്. രാജ്യമൊന്നാകെ എന്തിനെതിരെ പ്രതികരിക്കുന്നുവോ അതേ വിഷയത്തില്‍ അനുകൂലമെന്ന് തോന്നിക്കുന്ന നിലപാടാണ് കാരാട്ട് റസാഖിന്റേതെന്നാണ് എഐവൈഎഫ് സംസ്ഥാന ജോയിന്‍ സെക്രട്ടറി അഡ്വ. പി ഗവാസ് ചൂണ്ടിക്കാട്ടുന്നു.

ബിജെപിയുടെ കെണിയില്‍ വീഴുന്നതിന്റെ കാരണം ജാഗ്രത കുറവാണന്ന് മന്ത്രി കെ.ടി ജലീല്‍ വ്യക്തമാക്കി. ബിജെപി പ്രചാരണത്തില്‍ ഫോട്ടോയ്ക്ക് പോസ് ചെയ്ത ആര്‍ക്കെതിരെയൊക്കെ നടപടിയുണ്ടാകുമെന്നേ ഇനി അറിയേണ്ടതുള്ളു.