ശബരിമല: ബിന്ദു അമ്മിണി മന്ത്രി എ.കെ ബാലനെ കണ്ടതെന്തിന്? യുവതികൾ എത്തിയതിനു പിന്നിൽ ഗൂഡാലോചനയെന്ന് മുല്ലപ്പള്ളി

ശബരിമലയിലേക്ക് തൃപ്തി ദേശായിയുടെ നേതൃത്വത്തില്‍ യുവതികള്‍ സന്ദര്‍ശനത്തിന് എത്തിയത് പിന്നില്‍ ഗൂഢാലോചനയുണ്ടെന്ന് കെപിസിസി പ്രസിഡന്റ് മുല്ലപ്പള്ളി രാമചന്ദ്രന്‍.

തൃപ്തി ദേശായിക്കും സംഘത്തിനും ഒപ്പം ശബരിമല സന്ദര്‍ശനത്തിന് തയ്യാറായി എത്തുന്നതിന് മുമ്പ് ബിന്ദു അമ്മിണി സെക്രട്ടേറിയറ്റിലെത്തി മന്ത്രി എക ബാലനെ കണ്ടതായി റിപ്പോര്‍ട്ടുകളുണ്ടെന്നും അത് എന്തിനു വേണ്ടിയായിരുന്നെന്ന് വ്യക്തമാക്കാന്‍ മന്ത്രി തയ്യാറാകണമെന്നും മുല്ലപ്പള്ളി ആവശ്യപ്പെട്ടു.

തൃപ്തി ദേശായിയുടെ കഴിഞ്ഞകാല നിലപാടുകളും രാഷ്ട്രീയ ബന്ധവും പരിശോധിക്കണം. ആക്റ്റിവിസം നടത്താനാണെങ്കില്‍ മറ്റെന്തെല്ലാം വേദികളുണ്ട്. ശബരിമലയില്‍ പോയി നാടകം നടത്തേണ്ട കാര്യം ഇല്ല. സംഘര്‍ഷമുണ്ടാക്കാനാണ് ശ്രമമെന്നും ഇതിന് പിന്നില്‍ ഗൂഢാലോചനയുണ്ടെന്നും മുല്ലപ്പള്ളി ആരോപിച്ചു.

ആര്എസ്എസും സിപിഎമ്മുമായി തമ്മിൽ നടത്തിയ ഗൂഢാലോചനയാണ് സന്ദര്‍ശനത്തിന് പിന്നിലെന്നും കെപിസിസി പ്രസിഡന്റ് ആരോപിച്ചു. ശബരിമല യുവതീ പ്രവേശനത്തില്‍ നിലപാട് വ്യക്തമാക്കാന്‍ സര്‍ക്കാര്‍ തയ്യാറാകണമെന്നും മുല്ലപ്പള്ളി രാമചന്ദ്രന്‍ ആവശ്യപ്പെട്ടു.