പൗരത്വ നിയമ ഭേദഗതി; ചെന്നിത്തലയുടെ നിലപാടാണ് ശരിയെന്ന് കെ.പി.എ മജീദ്; മുല്ലപ്പള്ളിയെ തള്ളി മുസ്ലീംലീഗ്

തിരുവനന്തപുരം: പൗരത്വ നിയമ ഭേദഗതിക്കെതിരായ പ്രക്ഷോഭവുമായി ബന്ധപ്പെട്ട് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രനെതിരെ മുസ്ലിം ലീഗ്. പൗരത്വ നിയമ ഭോദഗതിക്കെതിരെ സി. പി.എമ്മുമായി യോജിച്ച പ്രക്ഷോഭം നടത്തിയ പ്രതിപക്ഷ നേതാവ് രമേശ് ചെന്നത്തലയുടേത് ശരിയായ നിലപാടാണെന്ന് ലീഗ് സംസ്ഥാന സെക്രട്ടറി കെ.പി.എ മജീദ് വ്യക്തമാക്കി.

പൗരത്വ ഭേദഗതി നിയമത്തിനെതിരെ ഇടതുമുന്നണിയുമായി യോജിച്ച സമരമാണ് വേണ്ടത്. പ്രതിപക്ഷ നേതാവ്മുഖ്യമന്ത്രിക്കൊപ്പം പ്രതിഷേധത്തില്‍ പങ്കെടുത്തത് ശരിയായ നിലപാടാണെന്നും കെ.പി.എ മജീദ് പറഞ്ഞു.

വിഷയത്തില്‍ ദേശീയ തലത്തിൽ കോണ്‍ഗ്രസും സിപിഎമ്മും ഒന്നിച്ചാണ് പ്രക്ഷോഭം നടത്തുന്നത്. മുസ്ലിം ലീഗ്, പ്രതിപക്ഷ നേതാവ് രമേശ് ചെന്നിത്തലയുടെ നിലപാടിനൊപ്പമാണെന്നും അദ്ദേഹം കൂട്ടിച്ചേര്‍ത്തു.

മുല്ലപ്പള്ളിയുടെ നിലപാട് തള്ളി സി.പി.എം സംസ്ഥാന സെക്രട്ടേറിയേറ്റും രംഗത്തെത്തിയിരുന്നു. പ്രതിഷേധത്തിൽ കോൺഗ്രസ്- സിപിഎം സഹകരണത്തെ വിമര്‍ശിച്ച മുല്ലപ്പള്ളിയുടെ നടപടി അങ്ങേയറ്റം സങ്കുചിതമാണെന്നായിരുന്നു സിപിഎം സെക്രട്ടേറിയറ്റ് പുറത്തിറക്കിയ പ്രസ്താവനയിൽ കുറ്റപ്പെടുത്തിയിരുന്നത്.

ദേശീയതാത്പര്യം മുന്‍നിര്‍ത്തി സംയുക്ത പ്രക്ഷോഭത്തിന് ഇറങ്ങിയ പ്രതിപക്ഷനേതാവ് രമേശ് ചെന്നിത്തല, മുന്‍മുഖ്യമന്ത്രി ഉമ്മന്‍ചാണ്ടി, മുസ്‌ലീം ലീഗ് എന്നിവരെ സിപിഎം പ്രശംസിക്കുകയും ചെയ്തിരുന്നു.