നേത്രാവതി എക്സ്പ്രസിന്‍റെ എഞ്ചിനും ബോഗിയും വേർപെട്ടു; ഒഴിവായത് വൻ ദുരന്തം

തിരുവനന്തപുരത്തു നിന്ന് പുറപ്പെട്ട നേത്രാവതി എക്സ്പ്രസിന്റെ എൻജിനും ബോഗിയും തമ്മിൽ വേർപ്പെട്ടു. തിരുവനന്തപുരം പേട്ട റെയിൽവേ സ്റ്റേഷനു സമീപം ഇന്ന് രാവിലെയാണ് സംഭവം. ട്രെയിന് വേഗം കുറവായതിനാലാണ് വൻ ദുരന്തം ഒഴിവായതെന്ന് റെയിൽവേ വൃത്തങ്ങൾ പറയുന്നു.

ഇന്ന് രാവിലെ 9.45ന് തിരുവനന്തപുരത്തുനിന്ന് ലോകമാന്യ തിലകിലേക്ക് പുറപ്പെട്ട ട്രെയിനാണ് അപകടത്തിൽപ്പെട്ടത്. പേട്ട റെയിൽവേ സ്റ്റേഷനിൽനിന്ന് മുമ്പോട്ട് എടുക്കവെയാണ് ബോഗികൾ വേർപെട്ടത്. എഞ്ചിൻ മുതൽ ബി6 വരെയുള്ള നാല് ബോഗികളുമായി എഞ്ചിൻ മുന്നോട്ടുപോയി. എന്നാൽ വേർപെട്ട ബോഗികൾ പതുക്കെ സഞ്ചരിച്ച് കൊച്ചുവേളിയിലെത്തി. ശേഷിച്ച ബോഗികൾ പേട്ട സ്റ്റേഷനിൽ കിടക്കുകയും ചെയ്തു.

പേട്ടയിൽനിന്ന് ട്രെയിൻ എടുത്തപ്പോൾ വേഗം കുറവായതിനാലാണ് വലിയ ദുരന്തം ഒഴിവായത്. പിന്നീട് റെയിൽവേ ഉദ്യോഗസ്ഥർ സ്ഥലത്ത് എത്തി എഞ്ചിൻ ബോഗിയുമായി ഘടിപ്പിച്ച് യാത്ര തുടരുകയായിരുന്നു. കപ്ലറിൽ ഉണ്ടായ തകരാറാണ് ബോഗികൾ വേർപെടാൻ കാരണമായത്. റെയിൽവേയുടെ സുരക്ഷാ വീഴ്ചയാണിതെന്നാണ് യാത്രക്കാർ ആരോപിക്കുന്നത്.