മദ്യശാലകൾ പൂട്ടില്ലെന്ന് സർക്കാർ; വാങ്ങാനെത്തുന്നവർ മാസ്ക് കരുതണം

തിരുവനന്തപുരം: മദ്യത്തിന്റെ കാര്യത്തിൽ കൊറോണയ്ക്കും സർക്കാരിന്റെ വീര്യം ചോർത്താനാകില്ല. മദ്യശാലകളൊന്നും അടച്ചിടേണ്ടതില്ലെന്ന നിലപാടിൽ ഉറച്ചു നിൽക്കുകയാണ് സർക്കാർ. അതേസമയം മ‍ദ്യ വിൽപ്പനശാലകളിൽ കർശന സുരക്ഷാ മാനദണ്ഠങ്ങൾ പാലിക്കാനാണ് തീരുമാനം. ഇതു സംബന്ധിച്ച സർക്കുലർ ബിവറേജസ് കോർപ്പറേഷൻ എം.ഡി. സ്പർജൻ കുമാർ പുറത്തിറക്കി

മദ്യം വാങ്ങാനെത്തുന്നവരോട് മാസ്കും സാനിറ്റൈസറും ഉപയോഗിക്കാൻ നിർദേശിക്കും. ക്യൂവിൽ നിൽക്കുന്ന ആളുകളുടെ എണ്ണം കുറയ്ക്കുന്നതിനാണ് പ്രഥമ പരിഗണനയെന്ന് എക്സൈസ് മന്ത്രി ടി.പി. രാമകൃഷ്ണനും വ്യക്തമാക്കിയിരുന്നു

 കൂടുതൽ പ്രീമിയം കൗണ്ടറുകൾ തുടങ്ങാനുള്ള നടപടികൾ ആരംഭിച്ചു. ഒരു ക്യൂവിൽ 30 പേരെന്ന നിലയിൽ നിയന്ത്രിക്കും. എണ്ണം കൂടിയാൽ ഉടൻ അടുത്ത കൗണ്ടർ ആരംഭിക്കും. ഇതിനായി സുരക്ഷാ ഉദ്യോഗസ്ഥരെ കരാർ അടിസ്ഥാനത്തിൽ കമ്പനികളിൽ നിന്നും നിയമിക്കുമെന്നും മന്ത്രി പറഞ്ഞു.

മൂന്നു സുരക്ഷാ ഉദ്യോഗസ്ഥരെ വീതം നിയമിക്കാനാണ് ആലോചന. മദ്യം വാങ്ങാനെത്തുന്നവർ തമ്മിൽ ഒരു മീറ്റർ അകലം പാലി‍ക്കണമെന്നും സർക്കുലറിൽ വ്യക്തമാക്കുന്നു

അതേസമയം നാളെ ചേരുന്ന മന്ത്രിസഭാ യോഗത്തിൽ മദ്യശാലകളുടെ വിഷയം ചർച്ചയാകുമെന്നാണ് സൂചന. ബിവറേജസ് ഔട്ട്ലെറ്റുകളെ ഒഴിവാക്കി ബാറുകൾ അടച്ചിടുന്ന കാര്യവും പരിഗണിച്ചേക്കും