മരടിലെ മാലിന്യം ഇനി എങ്ങോട്ട് ?

മരടിലെ ഫ്ലാറ്റുകളിലെ കോൺക്രീറ്റ് മാലിന്യം നീക്കം ചെയ്യുകയെന്നതാണ് ഇനിയുള്ള നടപടി. മാലിന്യങ്ങൾ നീക്കം ചെയ്യുന്നതിന് കരാർ ഏറ്റെടുത്ത പോംപ്റ്റ് കമ്പനി ഇതിനായി പഞ്ചായത്തുകൾക്ക് ഉടൻ അപേക്ഷ നൽകും.

അരൂർ , എഴുപുന്ന, കുമ്പളം എന്നിവിടങ്ങളിലാണ് മാലിന്യം എത്തിക്കാൻ കമ്പനി ഉദേശിക്കുന്നത്. ഇതിൽ അരൂരിലും എഴുപുന്നയിലും പ്രദേശവാസികളുടെയും പഞ്ചായത്തിന്റെയും എതിർപ്പുണ്ട്. ഇത് മറികടന്ന് വേണം അനുമതി നേടാൻ.

നിയന്ത്രിത സ്ഫോടനത്തിലൂടെ മരടിലെ ഫ്ലാറ്റുകൾ പൊളിച്ചതിനെത്തുടർന്ന് 76350 ടൺ മാലിന്യമാണ് ഉണ്ടായിട്ടുള്ളത്. ഇത് നീക്കം ചെയ്യുന്നതിന് 70 ദിവസത്തെ സമയമാണ് കമ്പനിക്ക് നൽകിയിരിക്കുന്നത്. നിശ്ചിത സമയത്തിനുള്ളിൽ ഇത് മാറ്റുക എന്നത് വെല്ലുവിളിയാണ്.

കരാർ ഏറ്റെടുത്ത കോൺക്രീറ്റ് മാലിന്യത്തിൽ നിന്ന് പുനരുപയോഗിക്കാവുന്ന ഇരുമ്പ് കമ്പി ഉൾപ്പെടെ വേർതിരിയ്ക്കേണ്ടതുണ്ട്. ബ്ലാസ്റ്റിംഗ് കമ്പനിയായ എഡിഫെസ് വിജയ സ്റ്റീൽസിനെയാണ് ഏൽപ്പിച്ചിരിക്കുന്നത്. സമയബന്ധിതമായി ഇത് പൂർത്തിയാകുമോയെന്ന ആശങ്കയും ഉണ്ട്. എന്നാൽ മാലിന്യ നീക്കം ഉടൻ ആരംഭിക്കുമെന്ന പ്രതീക്ഷയാണ് ജില്ലാ ഭരണകൂടം മുന്നോട്ട് വെയ്ക്കുന്നത്