നിയമസഭാ സ്പീക്കറുടെ ഓഫീസിന് മുന്നിലെ സംഘർഷം; ദൃശ്യങ്ങൾ പകർത്തിയതിന് പ്രതിപക്ഷ എംഎൽഎമാരുടെ പേഴ്സണല്‍ സ്റ്റാഫിന് നോട്ടീസ്

തിരുവനന്തപുരം: നിയമസഭാ സമ്മേളനത്തിനിടെ സ്പീക്കറുടെ ഓഫീസിന് മുന്നിലുണ്ടായ സംഘർഷം മൊബൈൽ ഫോണിൽ ചിത്രീകരിച്ചതിന് പ്രതിപക്ഷ എംഎൽഎമാരുടെ പേഴ്സണൽ സ്റ്റാഫിന് നോട്ടീസ്. അതീവ സുരക്ഷാ മേഖലയിൽ ദൃശ്യങ്ങൾ പകർത്തിയെന്ന് ആരോപിച്ചാണ് നോട്ടീസ്. 15 ദിവസത്തിനകം കാരണം കാണിക്കണമെന്ന് നോട്ടീസില്‍ ആവശ്യപ്പെടുന്നു. നിയമസഭാ സെക്രട്ടറിയേറ്റിലെ അണ്ടർ സെക്രട്ടറിയാണ് നോട്ടീസ് നല്‍കിയത്.

എംഎൽഎമാരായ എം വിൻസെന്റ്, ടി സിദ്ദിഖ്, കെ കെ രമ, ഡോ.എം കെ മുനീർ, എ പി അനിൽകുമാർ, പി കെ ബഷീർ, ആബിദ് ഹുസൈൻ തങ്ങൾ എന്നിവരുടെ പേഴ്സണൽ സ്റ്റാഫുകള്‍ക്കാണ് നോട്ടീസ്. കാരണം ബോധിപ്പിച്ചില്ലെങ്കിൽ അച്ചടക്ക നടപടി സ്വീകരിക്കുമെന്നും സ്പീക്കറുടെ ഓഫീസ് നോട്ടീസില്‍ വ്യക്തമാക്കി.

സംഘർഷവുമായി ബന്ധപ്പെട്ട പൊലീസ് അന്വേഷണവും നടക്കുന്നുണ്ട്. നിയമസഭാ സംഘര്‍ഷവുമായി ബന്ധപ്പെട്ട് രജിസ്റ്റര്‍ ചെയ്ത കേസില്‍ പ്രതിപക്ഷ എംഎല്‍എമാര്‍ക്കെതിരെ ചുമത്തിയ ജാമ്യമില്ലാ വകുപ്പുകളില്‍ ഒന്നായ ഐപിസി 326 ഒഴിവാക്കി പൊലീസ് തിരുവനന്തപുരം നേരത്തെ സിജെഎം കോടതിയില്‍ റിപ്പോര്‍ട്ട് സമര്‍പ്പിച്ചിരുന്നു.

വാച്ച് ആന്‍ഡ് വാര്‍ഡിന്റെ കൈയ്ക്ക് പൊട്ടലില്ലെന്ന റിപ്പോര്‍ട്ടിനെ തുടര്‍ന്നാണ് നടപടി. ഔദ്യോഗിക ജോലി തടഞ്ഞ് ആക്രമിച്ചെന്ന മറ്റൊരു മറ്റൊരു ജാമ്യമില്ലാ വകുപ്പായ ഐപിസി 322 നിലനില്‍ക്കും. കേസ് അന്വേഷണം ക്രൈം റെക്കോഡ്‌സ് ബ്യൂറോ എസിപിക്കാണ്

ജനുവരി 23ന് ആരംഭിച്ച 15ാം നിയമസഭയുടെ എട്ടാം സമ്മേളനത്തിനിടെയാണ് സംഘർഷമുണ്ടായത്. സ്പീക്കർ നിരന്തരം അടിയന്തര പ്രമേയ നോട്ടീസ് അവഗണിക്കുന്നുവെന്ന് ആരോപിച്ചാണ് പ്രതിപക്ഷ എംഎൽഎമാർ അദ്ദേഹത്തിന്റെ നിയമസഭയിലെ ഓഫീസിന് മുന്നിൽ കുത്തിയിരുന്ന് പ്രതിഷേധിച്ചത്. തുടർന്ന് വാച്ച് ആൻഡ‍് വാർഡുമായി കൈയാങ്കളിയായി. സംഘർഷത്തിനിടെ കെ കെ രമ എംഎൽഎയുടെ കൈയ്ക്ക് പൊട്ടലേറ്റിരുന്നു.