കൊട്ടാരക്കരയിൽ KSRTC സൂപ്പർഫാസ്റ്റും മിനിലോറിയും കൂട്ടിയിടിച്ചു; ഒരാൾ മരിച്ചു; 22 പേർക്ക് പരിക്ക്

കൊല്ലം: കൊട്ടാരക്കര മൈലം ജംക്ഷനിൽ കെ.എസ്ആർടിസി സൂപ്പർ ഫാസ്റ്റും മിനി ലോറിയും കൂട്ടിയിടിച്ചു ഒരാൾ മരിച്ചു. മിനി ലോറി ഡ്രൈവർ തൊടുപുഴ സ്വദേശി സിജോ തോമസാണ് മരിച്ചത്. ബസിലുണ്ടായിരുന്ന 18 പേരെ കൊട്ടാരക്കര താലൂക്കാശുപത്രിയിലും മൂന്നുപേരെ സ്വകാര്യ ആശുപത്രിയിലും പരിക്കുകളോടെ പ്രവേശിപ്പിച്ചു. മിനി ലോറിയിൽ ഡ്രൈവറോടൊപ്പമുണ്ടായിരുന്ന ഹാബേലിനെ ഗുരുതര പരിക്കുകളോടെ തിരുവനന്തപുരം മെഡിക്കൽ കോളേജിൽ പ്രവേശിപ്പിച്ചു.

തിരുവനന്തപുരത്തു നിന്നും മൂന്നാറിലേക്ക് പോവുകയായിരുന്ന കെഎസ്ആർടിസി ബസ്സും എറണാകുളത്തുനിന്നും ആസിഡുമായി നെടുമങ്ങാടേക്ക് വരികയായിരുന്ന മിനിലോറിയും കൂട്ടിയിടിച്ചാണ് അപകടമുണ്ടായത്.

അമിത വേഗതയിൽ വന്ന കെ.എസ്.ആർ.ടി.സി ബസ് മറ്റൊരു ലോറിയെ മറികടക്കുന്നതിനിടയിൽ പിക് അപ്പ് മായി ഇടിച്ചാണ് അപകടമുണ്ടായതെന്നു പോലീസ് അറിയിച്ചു. അപകടമുണ്ടായ ഉടനെ ഓടിക്കൂടിയ നാട്ടുകാരും പൊലീസും ചേർന്നാണ് രക്ഷാപ്രവർത്തനം നടത്തിയ പരിക്കേറ്റവരെ കൊട്ടാരക്കരയില വിവിധ ആശുപത്രികളിൽ പ്രവേശിപ്പിച്ചു.