വൺ വേ ലംഘനം; ഒരുവർഷത്തിനിടെ വാഹനാപകടത്തിൽ പൊലിഞ്ഞത് 115 ജീവനുകൾ

തിരുവനന്തപുരം: വൺ വേ ട്രാഫിക് ലംഘിച്ച് വാഹനമോടിച്ചുണ്ടായ അപകടങ്ങളിൽ 2018ൽ മാത്രം കേരളത്തിൽ 115 പേർ മരിച്ചു. 1700ഓളം പേർക്കാണ് ഇത്തരം അപകടങ്ങളിൽ പരിക്കേറ്റത്. കേരള റോഡ് സുരക്ഷാ അതോറിറ്റി പുറത്തുവിട്ട കണക്കുകളിലാണ് ഇക്കാര്യമുള്ളതെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു.

ഇതേത്തുടർന്ന് വിഷയത്തിൽ ശക്തമായ ഇപടെലിന് ഒരുങ്ങുകയാണ് സ്റ്റേറ്റ് റോഡ് സുരക്ഷാ അതോറിറ്റി. ഇക്കാര്യത്തിൽ ശക്തമായ നടപടി സ്വീകരിക്കണമെന്ന് ആവശ്യപ്പെട്ട് കേരള പൊലീസ് മേധാവി, ട്രാൻസ്പോർട്ട് കമ്മീഷണർ, ജില്ലാ കളക്ടർമാർ എന്നിവർക്ക് റോഡ് സുരക്ഷാ അതോറിറ്റി എൻ ശങ്കർ റെഡ്ഡി കത്തയച്ചു.

സുരക്ഷാ മുന്നറിയിപ്പ് വകവെക്കാതെ വൺ വേ റോഡുകളിലേക്ക് തെറ്റായ ദിശയിൽ കടക്കുന്നത് അപകടങ്ങൾ വർധിക്കാൻ ഇടയാക്കുന്നുവെന്നാണ് റോഡ് സുരക്ഷാ അതോറിറ്റിയുടെ റിപ്പോർട്ടിൽ പറയുന്നത്. ഇത്തരത്തിൽ അലക്ഷ്യമായി വൺ വേ റോഡുകളിലേക്ക് തെറ്റായ ദിശയിൽ പ്രവേശിക്കുന്നത് കർശനമായി നിയന്ത്രിക്കണമെന്നാണ് റോഡ് സുരക്ഷാ അതോറിറ്റി നിർദേശിക്കുന്നത്.

കൂടുതൽ അപകടങ്ങളും രാത്രിയിലാണ് സംഭവിക്കുന്നത്. അതുകൊണ്ടുതന്നെ രാത്രിയിലും പരിശോധനയും നിരീക്ഷണവും കർശനമാക്കണമെന്നും നിർദേശമുണ്ട്. കൂടുതൽ ദൂരം യാത്ര ചെയ്യുന്നത് ഒഴിവാക്കാനാണ് പലരും എളുപ്പത്തിനുവേണ്ടി വൺ വേ റോഡുകളിൽ തെറ്റായ ദിശയിൽ യാത്ര ചെയ്യുന്നത്. എന്നാൽ ഇത് പലപ്പോഴും വലിയ അപകടങ്ങൾക്ക് ഇടയാക്കുന്നതായാണ് റോഡ് സുരക്ഷാ അതോറിറ്റി പറയുന്നത്.