ഒരേ സമയം അഞ്ച് പേർ മാത്രം; മദ്യശാലകൾ തുറക്കാനുള്ള ഒരുക്കങ്ങൾ ഇങ്ങനെ

കേന്ദ്രം ഇളവുകൾ അനുവദിച്ചിട്ടും മദ്യശാലകൾ തുറക്കുന്നത് നേരത്തെ സംസ്ഥാന സർക്കാർ ഒഴിവാക്കിയിരുന്നു. കോവിഡിൻ്റെ പശ്ചാത്തലത്തിൽമദ്യശാലകൾക്ക് മുന്നിലെ തിരക്ക് ഒഴിവാക്കാനുള്ള നടപടികൾ സ്വീകരിച്ച ശേഷമേ മദ്യശാലകൾ തുറക്കാനാകൂവെന്നായിരുന്നു സർക്കാർ നിലപാട്.

ഇതിൻ്റെ ഭാഗമായി മദ്യശാലകൾക്ക് മുന്നിലെ ക്രമീകരണങ്ങൾ ആരംഭിച്ചു കഴിഞ്ഞു. ഒരേ സമയം അഞ്ച് പേർക്ക് മാത്രം മദ്യഷോപ്പിൻ്റെ കോമ്പൗണ്ടിൽ ക്യു നിൽക്കാനുള്ള സംവിധാനമാണ് ഒരുക്കിയിരിക്കുന്നത്. ഇതിനായി കോമ്പൗണ്ടിൽ കോളങ്ങൾ വരച്ചിട്ടുണ്ട്. അതിൽ അക്കങ്ങളുമുണ്ട്.

ഈ കോളത്തിലാണ് മദ്യം വാങ്ങാൻ എത്തുന്നയാൾ ക്യു നിൽക്കേണ്ടത്. ഓരോരുത്തരെയായി കൗണ്ടറിലേക്ക് കടത്തി വിടും. തുടർന്ന് മദ്യം വാങ്ങി മടങ്ങാം. കോമ്പൗണ്ടിൽ നിൽക്കുന്ന ആളുകൾ മദ്യശാലക്കുള്ളിലേക്ക് പ്രവേശിച്ച ശേഷം മാത്രമേ പുതിയതായി ആളുകളെ കോമ്പൗണ്ടിൽ പ്രവേശിപ്പിക്കു.

മദ്യം വാങ്ങാൻ എത്തുന്നവർ മാസ്ക് നിർബന്ധമായി ധരിക്കുന്നതിനൊപ്പം മദ്യശാലയിൽ ഒരുക്കിയിരിക്കുന്ന സാനിറ്റൈസർ ഉപയോഗിച്ച് കൈകൾ വൃത്തിയാക്കണം. മദ്യം വാങ്ങാൻ വെർച്ച്വൽ ക്യു സംവിധാനമാണ് സർക്കാർ ഒരുക്കുന്നത്.

ഇതിൻ്റെ ഭാഗമായി മൊബൈൽ ആപ്പും തയ്യാറാവുകയാണ്. ആപ്പിലൂടെ മദ്യം ബുക്ക് ചെയ്ത ശേഷം നിശ്ചയിക്കുന്ന സമയത്ത് ബുക്ക് ചെയ്തതിൻ്റെ ടോക്കണുമായി മദ്യശാലയിൽ എത്തി മദ്യം വാങ്ങാൻ കഴിയുന്ന വിധത്തിലാണ് സംവിധാനം.