Karipur Air India Express Crash| അപകടസ്ഥലം സന്ദർശിച്ച് പ്രതിപക്ഷം; ദുഃഖകരമായ സംഭവമെന്ന് ചെന്നിത്തല

വിമാനപകടം നടന്ന കരിപ്പൂർ വിമാനത്താവളം പ്രതിപക്ഷ നേതാവ് രമേശ് ചെന്നിത്തലയും കെ.പി.സി.സി പ്രസിഡന്‍റ് മുല്ലപ്പള്ളി രാമചന്ദ്രനും സന്ദർശിച്ചു.

മറ്റ് കോണ്‍ഗ്രസ്, യു.ഡി.എഫ് നേതാക്കളും ഒപ്പമുണ്ടായിരുന്നു. ഏറ്റവും ദുഃഖകരമായ സംഭവമെന്നും അപകടത്തിൽ മരിച്ചവരുടെ കുടുംബങ്ങളെ അനുശോചനം അറിയിക്കുന്നതായും രമേശ് ചെന്നിത്തല പറഞ്ഞു.

അപകടത്തിൽ പരിക്കേറ്റവരുടെ തുടർ ചികിത്സ സർക്കാർ ഏറ്റെടുക്കണമെന്ന് മുല്ലപ്പള്ളി രാമചന്ദ്രൻ ആവശ്യപ്പെട്ടു.

സംഭവത്തെക്കുറിച്ച് വിശദമായ അന്വേഷണം നടത്തിയാൽ മാത്രമേ അപകടത്തിന്‍റെ കാരണം വ്യക്തമാവുകയുള്ളൂവെന്നും സംസ്ഥാന ചരിത്രത്തിൽ ആദ്യമായാണ് ഇത്തരം ഒരപകടമെന്നും പ്രതിപക്ഷ നേതാവ് രമേശ് ചെന്നിത്തല പറഞ്ഞു.

അപകടത്തില്‍ മരിച്ചവർക്ക് ആദരാഞ്ജലികൾ അർപ്പിച്ച രമേശ് ചെന്നിത്തല രക്ഷാപ്രവർത്തനം നടത്തിയ നാട്ടുകാരെ അഭിനന്ദിച്ചു.