അലനും താഹയും ഇപ്പോഴും സിപിഎം അംഗങ്ങള്‍: UAPA കേസില്‍ മുഖ്യമന്ത്രിയെയും ജയരാജനെയും തള്ളി പി.മോഹനൻ

പന്തീരങ്കാവിൽ യുഎപിഎ ചുമത്തപ്പെട്ട് അറസ്റ്റിലായ അലൻ ഷുഹൈബും താഹ ഫസലും സിപിഎം അംഗങ്ങൾ തന്നെയെന്ന് സിപിഎം ജില്ലാ സെക്രട്ടറി പി മോഹനൻ.

പന്തീരാങ്കാവ് സംഭവം അന്വേഷിക്കാന്‍ സിപിഎം കമ്മീഷനെ നിയോഗിച്ചിട്ടുണ്ട്. ഇരുവരും ജുഡീഷ്യൽ കസ്റ്റഡിയിൽ ആയതിനാൽ അവരുടെ ഭാഗം കേൾക്കാൻ ആയിട്ടില്ല. കുട്ടികളുടെ ഭാഗം കേൾക്കാതെ ഒരു നിഗമനത്തിലും എത്തില്ലെന്നും പി ജയരാജൻ പറഞ്ഞതിനെക്കുറിച്ച് തനിക്ക് അറിയില്ലെന്നും പി മോഹനൻ വ്യക്തമാക്കി.

ഇരുവരും മാവോയിസത്തിൻറെ സ്വാധീനത്തിൽ പെട്ട് പോയിട്ടുണ്ടെങ്കിൽ തന്നെ തിരുത്തി എടുക്കാനായിരിക്കും സിപിഎം ശ്രമിക്കുകയെന്നും പി മോഹനന്‍ പറഞ്ഞു. ​അവരെ സസ്പെൻഡ് ചെയ്തതെന്ന് പാർട്ടി ഇതുവരെ ഔദ്യോഗികമായി പറഞ്ഞിട്ടില്ല. അലനും താഹയ്ക്കുമെതിരെ ഇതുവരെ നടപടിയൊന്നും എടുത്തിട്ടില്ലെന്നും പി മോഹനൻ അറിയിച്ചു.

അലനും താഹയും മാവോയിസ്റ്റുകൾ തന്നെയാണെന്ന് ആവർത്തിച്ച് പറഞ്ഞ മുഖ്യമന്ത്രിയെക്കൂടി തള്ളുന്നതായിരുന്നു പി മോഹനന്‍റെ പ്രതികരണം. സർക്കാർ അവരുടെ തലത്തിലാണ് പ്രവർത്തിക്കുന്നതെന്ന് മോഹനന്‍ പറഞ്ഞു.

അലനും താഹയും മാവോയിസ്റ്റുകളാണെന്ന് മുഖ്യമന്ത്രി പറഞ്ഞത് പൊലീസ് റിപ്പോർട്ടുകളുടെ അടിസ്ഥാനത്തിലാകാം. പന്തീരാങ്കാവ് കേസില്‍ യുഎപിഎ ചുമത്തേണ്ടതില്ല എന്നുതന്നെയാണ് പാര്‍ട്ടി നിലപാട്. കുട്ടികളുടെ രക്ഷിതാക്കൾക്ക് വേവലാതി ഉണ്ടാകും. രക്ഷിതാക്കളുടെ പരാതി ഗൗരവമായി കാണുന്നുണ്ടെന്നും അത് പാർട്ടി പരിഹരിക്കുമെന്നും പി മോഹനന്‍ പറഞ്ഞു.

മുഖ്യമന്ത്രിയും ജയരാജനും മാവോയിസ്റ്റുകള്‍ എന്ന് വിളിച്ച അലനെയും താഹയെയും കുട്ടികള്‍ എന്നാണ് പി മോഹനന്‍ വിശേഷിപ്പിച്ചതെന്നതും ശ്രദ്ധേയമാണ്.

അലന്‍ ഷുഹൈബ് എസ്എഫ്ഐയെ മറയാക്കി മാവോയിസ്റ്റ് പ്രവര്‍ത്തനം നടത്തിയെന്ന പി ജയരാജൻ പരാമര്‍ശത്തിനെതിരെ വലിയ പ്രതിഷേധം ഉയര്‍ന്നിരുന്നു. ജയരാജന് മറുപടിയായി 'ജയരാജന്‍ സഖാവ് വായിച്ചറിയാ'നെന്ന പേരില്‍ സബിത ശേഖര്‍ തന്‍റെ ഫെയ്സ് ബുക്ക് പേജില്‍ കുറിപ്പെഴുതുകയും ചെയ്തു.

അലന്‍ മാവോയിസ്റ്റ് പ്രവര്‍ത്തനം നടത്തിയിരുന്നെന്ന ജയരാജന്‍റെ വാദത്തെ പൂര്‍ണമായും തള്ളുകയാണ് സിപിഎം കോഴിക്കോട് ജില്ലാ നേതൃത്വം. കോഴിക്കോട്ടെ പാർട്ടി നേതൃത്വം തന്നെ അലനും താഹയ്ക്കും പിന്തുണയുമായി രംഗത്തെത്തുമ്പോൾ യുഎപിഎ കേസില്‍ പാർട്ടിയില്‍ രണ്ട് നിലപാടുണ്ട് എന്ന കാര്യം പരസ്യമാവുകയാണ്.