ശക്തമായി എതിർത്ത് പി.ജെ ജോസഫ്; ഒടുവിൽ സ്ഥാനാർഥി പ്രഖ്യാപനം

കോട്ടയം: പിജെ ജോസഫിന്റെ കടുത്ത എതിർപ്പിനിടെ ആണ് ജോസ് ടോം പുലിക്കുന്നേലിനെ യുഡിഎഫ് സ്ഥാനാർത്ഥിയായി പ്രഖ്യാപിച്ചത്. ജോസഫ് സസ്പെൻഡ് ചെയ്തയാളെ ജോസ് കെ മാണി സ്ഥാനാർത്ഥി ആക്കിയപ്പോൾ നിഷയുടെ സ്ഥാനാർഥി മോഹത്തെ അരിഞ്ഞു വീഴ്ത്തി ജോസഫ് തിരിച്ചടിച്ചു.

കേരള കോൺഗ്രസിലെ രാഷ്ട്രീയ ബലാബലത്തിൽ ഇക്കുറി വിജയം നേടിയത് ജോസഫാണ്. എന്നാൽ ജോസഫ് പുറത്താക്കിയ ആളെ സ്ഥാനാർത്ഥിയാക്കിയാണ് ജോസ് കെ മാണി മറുതന്ത്രം കളിച്ചത്. ഇതോടെ യുഡിഎഫ് യോഗത്തിൽ ജോസഫ് കടുത്ത വിയോജിപ്പ് രേഖപ്പെടുത്തി. ചിഹ്നം സംബന്ധിച്ച് തീരുമാനമാകാതെ പോയതും ജോസഫിൻറെ എതിർപ്പ് കൊണ്ട് തന്നെ. സ്ഥാനാർഥി തന്നെ ചിഹ്നം വേണ്ടെന്ന് പറഞ്ഞ സാഹചര്യത്തിൽ പാർട്ടി ചിഹ്നത്തിൽ ഇനി പ്രസക്തിയില്ലെന്ന് ജോസഫ് തുറന്നടിച്ചു. വിജയസാധ്യതയെക്കുറിച്ച് ചോദിച്ചപ്പോൾ തെരഞ്ഞെടുപ്പല്ലേയെന്ന ഒഴുക്കൻ മറുപടിയാണ് ജോസഫ് നൽകിയത്.

ജോസ് കെ മാണിയുടെ തട്ടകത്തിൽ അവരുടെ ആഗ്രഹപ്രകാരം സ്ഥാനാർത്ഥിയെ തീരുമാനിക്കാൻ ആയില്ല എന്നതാണ് ജോസഫിൻറെ ഒരു വിജയം. ചിഹ്നം സംബന്ധിച്ച് അധികാരവും തനിക്കാണെന്ന് ജോസഫ് തെളിയിച്ചു. തർക്കങ്ങൾക്ക് താൽക്കാലിക പരിഹാരമായി എങ്കിലും യുഡിഎഫിന് ഇതൊരു സ്ഥിരം തലവേദനയാകും എന്നുറപ്പ്.