മേയർ ബ്രോ MLAയായി: പാർവതി പുത്തനാറിൽ വീണ്ടും മാലിന്യം നിറയുന്നു

ഉറക്കം ഒഴിഞ്ഞ് കാവലിരുന്ന് പ്രശാന്ത് ബ്രോ നിരീക്ഷണം ശക്തമാക്കിയപ്പോൾ മാലിന്യം തള്ളുന്നത് ഒരു പരിധി വരെ കുറഞ്ഞിരുന്നു. ഇത്തരക്കാരെ പിടികൂടി പിഴ ചുമത്തി നിയമത്തിന് മുന്നിൽ കൊണ്ടുവന്ന പ്രശാന്ത് ബ്രോ പോയതോടെ വീണ്ടും കാര്യങ്ങൾ പഴയ പടിയാവുകയാണ്.

ഇരുട്ടിന്‍റെ മറവിൽ ഇറച്ചി മാലിന്യങ്ങൾ ചാക്കിൽ കെട്ടി പുത്തനാറിൽ തള്ളുന്നു. ഇരു കരകളിലൂടെയുമുള്ള യാത്രക്കാർക്ക് ഇപ്പോൾ ഒഴുകി നടക്കുന്ന ചാക്കുകെട്ടുകൾ കാണാം. നഗരത്തിലെ ഹോട്ടലുകളിൽ നിന്നും ഇറച്ചി കടകളിൽ നിന്നും മാലിന്യ അവശിഷ്ടങ്ങൾ ശേഖരിക്കുന്ന സംഘമാണ് ഇതിന് പിന്നിൽ.

ഹോട്ടലുടമകളിൽ നിന്ന് പണം വാങ്ങിയാണ് മാലിന്യ ശേഖരണം. എന്നാൽ, മാലിന്യ സംസ്കരണത്തിന് കൃത്യമായ സംവിധാനങ്ങളില്ല. ചാക്ക, മുട്ടത്തറ ഭാഗങ്ങളിൽ രാത്രി എത്തിയാണ് സംഘം മാലിന്യചാക്കുകൾ തള്ളുന്നത്. ഭീഷണി ഭയന്ന് സമീപവാസികൾ ഇവരെ ചോദ്യം ചെയ്യാറുമില്ല. പലയിടങ്ങളിലും വൈദ്യുതി പോസ്റ്റിലെ ട്യൂബ് ലൈറ്റുകൾ ഇവർ എറിഞ്ഞുടക്കും. സി സി ടി വി ക്യാമറകൾ സ്ഥാപിച്ച് ഇവരെ പിടികൂടണമെന്ന് പ്രദേശവാസികൾ ആവശ്യപ്പെടുന്നു. എന്നാൽ, ഇത് പ്രായോഗികമല്ലെന്നാണ് അധികൃതരുടെ പക്ഷം. നേരത്തെ വാർഡ് കൗൺസിലർമാർ അടക്കം ജനപ്രതിനിധികളോടും, പ്രാദേശിക നേതാക്കളോടും നിരന്തരം പരാതിപ്പെട്ടതിനെ തുടർന്നായിരുന്നു വി കെ പ്രശാന്തിന്‍റെ ഇടപെടൽ.

എന്നാൽ, ഇപ്പോൾ രാത്രികാല പരിശോധനകൾ കുറവാണ്. സർക്കാർ കോടികൾ മുടക്കിയാണ് പാർവ്വതി പുത്തനാറിലെ പോളകൾ നീക്കിയത്. മന്ത്രി കടകംപള്ളി സുരേന്ദ്രന്‍റെ നേതൃത്വത്തിൽ പരീക്ഷണാടിസ്ഥാനത്തിൽ ബോട്ട് സർവീസും നടത്തി. 2020 ജലപാത യാഥാർഥ്യമാകുമെന്നാണ് മുഖ്യമന്ത്രിയുടെ വാഗ്ദാനം.

ഒരു വശത്ത് പുത്തനാറിന്‍റെ പ്രതാപം വീണ്ടെടുക്കാൻ സർക്കാർ നിരന്തരം യത്നിക്കുമ്പോൾ മറുവശത്ത് വെല്ലുവിളികൾ ഇങ്ങനെയാണ്. രാത്രി കാലങ്ങളിൽ ഇവിടെ പൊലീസ് പട്രോളിങ് ശക്തമാക്കണമെന്നാണ് ആവശ്യം. ഡ്രയിനേജിനൊപ്പം ഇറച്ചി മാലിന്യങ്ങളും നിറയുന്നത് സാംക്രമിക രോഗങ്ങൾക്കുളള സാധ്യത വർദ്ധിപ്പിക്കുന്നു. ചാക്ക വാർഡ് കൗൺസിലർ കൂടിയായ പുതിയ മേയർ ഉണർന്ന് പ്രവർത്തിക്കണമെന്നാണ് റസിഡന്‍റ് അസോസിയേഷനുകളുടെ അഭ്യർഥന.