യു.വി ജോസ് കളക്ടറായിരിക്കെ ക്വാറിക്ക് അനുമതി: തഹസില്‍ദാരെയും വില്ലേജ് ഓഫീസറെയും പ്രതിക്കൂട്ടിലാക്കി അന്വേഷണ റിപ്പോര്‍ട്ട്

കോഴിക്കോട്: വ്യാജരേഖയുണ്ടാക്കിയ കൊടിയത്തൂര്‍ വില്ലേജില്‍ പാറഖനനത്തിന് അനുമതി നൽകിയ സംഭവത്തിൽ മുന്‍ തഹസില്‍ദാരെയും വില്ലേജ് ഓഫീസറെയും പ്രതിക്കൂട്ടിലാക്കി അന്വേഷണ റിപ്പോർട്ട്.

2018ല്‍ യു.വി ജോസ് ജില്ലാ കളക്ടറായിരിക്കെ സ്വകാര്യ ക്വാറിക്ക് പാരിസ്ഥിതികാനുമതി നൽകാൻ വ്യാജരേഖയുണ്ടാക്കിയതിന് അന്നത്തെ കോഴിക്കോട് തഹസില്‍ദാര്‍ കെ.ടി സുബ്രമണ്യം, കൊടിയത്തൂര്‍ വില്ലേജ് ഓഫീസറായിരുന്ന സുബ്രമണ്യന്‍ .ആര്‍ എന്നിവരെ പ്രതിക്കൂട്ടിലാക്കുന്നതാണ് ഡെപ്യൂട്ടി കളക്ടര്‍ സി ബിജു തയാറാക്കിയ അന്വേഷണ റിപ്പോര്‍ട്ട്.

നാല് ക്വാറികള്‍ക്ക് അനുമതി നല്‍കിയതാണ് വിവാദമായത്. അതിലൊന്നാണ് കൊടിയത്തൂര്‍ വില്ലേജിലെ ഈ ക്വാറി. പാരിസ്ഥിതികാനുമതി ലഭിക്കാന്‍ നടത്തിയ നിയമലംഘനങ്ങളില്‍ ഉദ്യോഗസ്ഥരുടെ പങ്ക് വെളിപ്പെടുത്തുന്നതാണ് റിപ്പോര്‍ട്ട്.

സ്‌കെച്ച് മാറ്റി വരച്ചതുള്‍പ്പെടെയുള്ള നിയമ ലംഘനങ്ങളില്‍ തഹസില്‍ദാർക്കും വില്ലേജ് ഓഫീസർക്കുമുള്ള പങ്ക് ഡപ്യൂട്ടി കളക്ടര്‍ സി ബിജു ജില്ലാ കളക്ടര്‍ക്ക് സമര്‍പ്പിച്ച റിപ്പോര്‍ട്ടില്‍ വ്യക്തമാക്കുന്നുണ്ട്.

ക്വാറിയിലേക്കുള്ള റോഡിന് 7.5 മീറ്റര്‍ വീതിയെങ്കിലും വേണമെന്നാണ് നിയമം. ഖനന സ്ഥലം പില്ലറുകള്‍ സ്ഥാപിച്ച് വേര്‍തിരിച്ച ശേഷം വില്ലേജ് ഓഫീസര്‍ സാക്ഷ്യപ്പെടുത്തി നല്‍കുന്ന ഡിമാര്‍ക്കേഷന്‍ സര്‍ട്ടിഫിക്കറ്റും സാക്ഷ്യപത്രങ്ങളും ആവശ്യമാണെന്നും നിയമമുണ്ട്.

ഇത് മറികടക്കാന്‍ ഇല്ലാത്ത റോഡ് ഉണ്ടെന്ന് കാണിച്ച് വില്ലേജ് ഓഫിസര്‍ സ്‌കെച്ച് നല്‍കിയെന്നാണ് ആരോപണം. ഡിമാര്‍ക്കേഷന്‍ സര്‍ട്ടിഫിക്കറ്റില്‍ ഖനന സ്ഥലം പില്ലറുകള്‍ നാട്ടി വേര്‍തിരിച്ചിട്ടുണ്ടെന്ന് വ്യാജമായി സാക്ഷ്യപെടുത്തി കൊടുത്തെന്നും അന്വേഷണത്തില്‍ കണ്ടെത്തി.

അതേസമയം ആരോപണവിധേയരായ മുന്‍ തഹസില്‍ദാറും വില്ലേജ് ഓഫീസറും പ്രതികരിക്കാന്‍ തയാറായിട്ടില്ല.