അലനും ത്വാഹയും ചായ കുടിക്കാൻ പോയതല്ലെന്ന മുഖ്യമന്ത്രിയുടെ പരാമർശം: രൂക്ഷ വിമർശനവുമായി കവി സച്ചിദാനന്ദൻ  

കോഴിക്കോട്: പന്തീരങ്കാവ് യു.എ.പി.എ കേസില്‍ മുഖ്യമന്ത്രിക്കെതിരെ വിമര്‍ശനമുയര്‍ത്തി കവിയും ഇടതുസഹയാത്രികനുമായ കെ സച്ചിദാനന്ദന്‍.

വിദ്യാര്‍ത്ഥികള്‍ക്കെതിരായ മുഖ്യമന്ത്രിയുടെ പരാമര്‍ശം ജനാധിപത്യപ്രതിനിധിയുടെ ഭാഗത്ത് നിന്ന് ഉണ്ടാവാന്‍ പാടില്ലാത്തതാണെന്ന് സച്ചിദാനന്ദന്‍ പറഞ്ഞു. സര്‍ക്കാറിന്റെ നിലപാട് നിരാശാജനകമാണെന്നും ഓഡിയോ സന്ദേശത്തില്‍ സച്ചിദാനന്ദന്‍ പറഞ്ഞു.

അലനും ത്വാഹയും ചായകുടിച്ചുകൊണ്ടിരിക്കുമ്പോഴാണ് അറസ്റ്റു ചെയ്തതെന്ന് കരുതേണ്ടെന്ന മുഖ്യമന്ത്രിയുടെ പരാമര്‍ശത്തിനെതിരെയാണ് കവി സച്ചിദാനന്ദന്‍ രംഗത്തെത്തിയത്. എന്തിന് അറസ്റ്റു ചെയ്തുവെന്ന് ചോദിക്കുമ്പോള്‍ സര്‍ക്കാറില്‍ നിന്ന് ലഭിക്കുന്ന മറുപടി അഹങ്കാരം നിറഞ്ഞതും നിരാശാജനകവുമാണെന്നും സച്ചിദാനന്ദന്‍ പറഞ്ഞു.

ലഘുലേഖയും പുസ്തകവും കൈവശം വെച്ചത് യു.എ.പി.എ ചുമത്താനുള്ള കുറ്റമല്ല. കുട്ടികള്‍ ചെയ്ത കുറ്റമെന്താണെന്ന് സര്‍ക്കാര്‍ പറയുന്നില്ല. ഇത് ഇടതുപക്ഷത്തിന് ചേര്‍ന്ന പ്രവര്‍ത്തിയല്ല- സച്ചിതാനന്ദന്‍ കുറ്റപ്പെടുത്തി.

വിദ്യാര്‍ത്ഥികള്‍ക്കെതിരെയുള്ള കേസിനെ ഒന്നിച്ചെതിര്‍ക്കണമെന്നും ഇത് ജനാധിപത്യത്തിനും ഭരണഘടനയ്ക്കും മനുഷ്യാവകാശത്തിനും വേണ്ടിയുള്ള ശബ്ദമാണെന്നും സച്ചിദാനന്ദന്‍ ഓഡിയോയില്‍ വ്യക്തമാക്കുന്നു.

യു.എ.പി.എ കേസിനെതിരെ കഴിഞ്ഞ ദിവസം കോഴിക്കോട് കെ.അജിതയുടെ നേതൃത്വത്തില്‍ അമ്മമാരുടെ സമരം നടന്നിരുന്നു. അലന്റെ മാതാവ് സബിത ശേഖറും കഴിഞ്ഞ ദിവസം മുഖ്യമന്ത്രിക്കെതിരെ ഫേസ്ബുക്ക് കുറിപ്പുമായി രംഗത്തെത്തിയിരുന്നു.