പൊലീസ് പരീക്ഷയിൽ ഒന്നാം റാങ്കുനേടിയ ഒന്നാം പ്രതിയുടെ വീട്ടിൽനിന്നും കേരളാ പൊലീസ് പിടിച്ചെടുത്തത്

തിരുവനന്തപുരം: യൂണിവേഴ്സിറ്റി കോളേജിലെ അഖിൽ വധശ്രമക്കേസിൽ ഒന്നാം പ്രതി ശിവരഞ്ജിത്തിന്റെ വീട്ടിൽ റെയ്ഡിനിടെ യൂണിവേഴ്സിറ്റി ഉത്തരപേപ്പറുകൾ പിടിച്ചെടുത്തു. ആറ്റുകാലിലെ വീട്ടിലാണ് വധശ്രമക്കേസ് അന്വേഷിക്കുന്ന കന്‍റോൺമെന്‍റ്  എസ്.ഐയുടെ നേതൃത്വത്തിലുള്ള പൊലീസ് സംഘമാണ് റെയ്ഡ് നടത്തിയത്.

ശിവരഞ്ജിത്തിന്‍റെ വീട്ടിൽനിന്ന് എഴുതാത്തതും എഴുതിയതുമായ ഉത്തര കടലാസുകൾ കണ്ടെത്തി. 16 ബുക്ക് ലെറ്റുകളാണ് ഇത്തരത്തിൽ കണ്ടെത്തിയത്. പരീക്ഷയ്ക്ക് കോപ്പിടയിക്കാനായാണ് ഇത് ഉപയോഗിക്കുന്നതെന്നാണ് പൊലീസ് സംശയിക്കുന്നത്.

കൂടാതെ ഫിസിക്കൽ എജ്യൂക്കേഷൻ ഡയറക്ടറുടെ സീലും ഇവിടെനിന്ന് പിടിച്ചെടുത്തിട്ടുണ്ട്.

ശിവരഞ്ജിത്തിന്റെ വീട്ടിലെത്തിയ മാധ്യമപ്രവർത്തകരെ ബന്ധുക്കൾ ആക്രമിക്കാൻ ശ്രമിച്ചു. കമ്പിവടിയുമായാണ് ബന്ധുക്കൾ മാധ്യമപ്രവർത്തകർക്കുനേരെ പാഞ്ഞടുത്തത്. പി.എസ്.സി പരീക്ഷയിൽ ശിവരഞ്ജിത്ത് ഒന്നാം റാങ്ക് ലഭിച്ചത് സ്പെഷ്യൽ ബ്രാഞ്ച് അന്വേഷിക്കുന്നുണ്ട്. ഈ പശ്ചാത്തലത്തിലാണ് ശിവരഞ്ജിത്തിന്‍റെ വീട്ടിൽ പൊലീസ് റെയ്ഡ് നടത്തുന്നത്. കേസിൽ ഇന്ന് നാല് പ്രതികൾ അറസ്റ്റിലായെങ്കിലും ശിവരഞ്ജിത്തും നസീമും ഉൾപ്പടെയുള്ളവർ ഇപ്പോഴും ഒളിവിലാണ്.

യൂണിവേഴ്സിറ്റി കോളേജിലെ വധശ്രമക്കേസുമായി ബന്ധപ്പെട്ട പ്രതികൾ പൊലീസ് കോൺസ്റ്റബിൾ പരീക്ഷയിൽ ഉന്നത റാങ്കുൾ നേടിയത് വിവാദമായിരുന്നു. അതിനിടെയാണ് പ്രതിയുടെ വീട്ടിൽനിന്ന് സർവകലാശാല ഉത്തരക്കടലാസുകൾ കണ്ടെത്തിയത്. ഇതോടെ ഈ വിഷയത്തിൽ കൂടുതൽ പരിശോധനയും അന്വേഷണവും നടത്താൻ ഒരുങ്ങുകയാണ് പൊലീസ്.