രാഹുലെത്തി; തിരുവനന്തപുരത്ത് ആവേശം ടോപ് ഗിയറിൽ

തിരുവനന്തപുരം: മന്ദഗതിയിലായിരുന്ന തിരുവനന്തപുരത്തെ പ്രചരണ പ്രവർത്തനങ്ങൾ കോൺഗ്രസ് അധ്യക്ഷൻ രാഹുൽ ഗാന്ധിയുടെ വരവോടെ കൂടതൽ ഊർജസ്വലമായതിന്റെ ആവേശത്തിലാണ് കോൺഗ്രസ് നേതൃത്വം.

കേരളത്തിന്റെയും കോൺഗ്രസിന്റെയും സമ്പത്ത് എന്നായിരുന്നു ശശി തരൂരിന് രാഹുൽ ഗാന്ധി നൽകിയ വിശേഷണം. അപകടത്തെ തു​ടർന്നുളള ആശുപത്രി വാസത്തിന് ശേഷമുളള തരൂരിന്റെ ആദ്യ പൊതു പരിപാടിയും ഇതായിരുന്നു.

സെൻട്രൽ സ്റ്റേഡിയം തിങ്ങി നിറഞ്ഞ തിരുവനന്തപുരം, ആറ്റിങ്ങൽ മണ്ഡലങ്ങളിലെ കോൺഗ്രസ് പ്രവർത്തകർ ആവേശത്തോടെയാണ് രാഹുൽ ഗാന്ധിയെ വരവേറ്റത്. ഇതോടെ അലസത വിട്ട് തിരുവനന്തപുരത്തെ പ്രചാരണ പ്രവർത്തനങ്ങൾ ടോപ്പ് ടിയറിൽ എത്തിക്കാൻ കഴിഞ്ഞു എന്ന വിലയിരുത്തലിലാണ് നേതൃത്വം.

കഴിഞ്ഞ തവണ തരൂരിനെ രക്ഷപെടുത്തിയ തീര മേഖലയ്ക്കും മത്സ്യത്തൊഴിലാളികൾക്കും പ്രത്യേക പരിഗണന നൽകി കൊണ്ടായിരുന്നു രാഹുൽ ഗാന്ധി നടത്തിയ പ്രസംഗം. ശശി തരൂർ മികച്ച പാർലമെന്റേറിയൻ ആണെന്നും കേരളത്തിന്റെയും കോൺഗ്രസിന്റെയും സമ്പത്ത് ആണെന്നും രാഹുൽ ഗാന്ധി പറഞ്ഞു.

തുലാഭാര നേർച്ചക്കിടെ തുലാസ് വീണ് പരുക്കേറ്റ ശശി തരൂർ ആശുപത്രി വിട്ട ശേഷം പങ്കെടുത്ത ആദ്യ പൊതുപരിപാടിയും ഇതായിരുന്നു. തലയിൽ കെട്ടുമായാണ് തരൂർ പൊതു സമ്മേളനത്തിന് എത്തിയത്.