പി.എസ്.സിയുടെയും മുഖ്യമന്ത്രിയുടെയും വിശ്വാസ്യത തകർന്നു; CBI അന്വേഷണം വേണമെന്ന് ചെന്നിത്തല

തിരുവനന്തപുരം: പി.എസ്.സി ക്രമക്കേടിൽ പ്രതിപക്ഷ ആരോപണങ്ങൾ ശരിയെന്ന് തെളിഞ്ഞുവെന്ന് രമേശ് ചെന്നിത്തല. എസ്എഫ്ഐ നേതാക്കൾ പി.എസ്.സി സംവിധാനങ്ങളെ അട്ടിമറിച്ചു.

ഇക്കാര്യത്തിൽ പി.എസ്.സിയുടെയും മുഖ്യമന്ത്രിയുടെയും വിശ്വാസ്യത തകർന്നു. മുഖ്യമന്ത്രിയുടെ കീഴിലുള്ള പൊലീസ് കേസ് അന്വേഷിച്ചാൽ എസ്എഫ്ഐക്കാരെ രക്ഷപ്പെടുത്താനുള്ള പഴുതുകൾ ആകും കണ്ടെത്തുക.

ഡിജിപി ക്രൈംബ്രാഞ്ച്  അന്വേഷണം പ്രഖ്യാപിച്ചപ്പോൾ മുഖ്യമന്ത്രി ഇടപെട്ടാണ് തടഞ്ഞത്. പരീക്ഷക്രമക്കേടിൽ സിബിഐ അന്വേഷണം വേണമെന്നും ചെന്നിത്തല ആവശ്യപ്പെട്ടു.

മുഖ്യമന്ത്രി അനുയായികളെ സംരക്ഷിക്കാൻ ശ്രമിച്ചു.
പി.എസ്.സിയിൽ അഴിമതിയും സ്വജനപക്ഷപാതവുമാണ് നടന്നത്. പി.എസ്.സി ചെയർമാന്റെ ഇടപെടലും അന്വേഷിക്കണം. മൂന്ന് പേർമാത്രമാണൊ ക്രമക്കേട് നടത്തിയത്? കൂടുതൽ പരീക്ഷകളിൽ ക്രമക്കേട് നടന്നിട്ടുണ്ടോ? എന്നിവയൊക്കെ അന്വേഷിക്കണം.

എസ്എഫ്ഐ നേതാക്കൾക്ക് മൊബൈൽ ഫോൺ കൊണ്ടുപോകാൻ സൗകര്യം നൽകിയ ഇൻവിജിലേറ്റർ അടക്കമുള്ളവർക്കെതിരെ അന്വേഷണം വേണമെന്നും ചെന്നിത്തല ആവശ്യപ്പെട്ടു.