Local Body Election 2020 | മുസ്ലിം ലീഗിന് തലവേദനയായി പികെ കുഞ്ഞാലിക്കുട്ടിയുടെ വാർഡിൽ റിബൽ സ്ഥാനാർത്ഥി; പിന്തുണച്ച് എൽ.ഡി.എഫ്

മലപ്പുറം: മുസ്ലിം ലീഗ് ദേശീയ ജനറല്‍ സെക്രട്ടറിയും മലപ്പുറം എം.പി യുമായ പി.കെ കുഞ്ഞാലിക്കുട്ടിയുടെ വാര്‍ഡില്‍ ലീഗിനെതിരെ വിമത സ്ഥാനാര്‍ത്ഥി. വിമതന് എൽഡിഎഫ് പിന്തുണ കൂടി പ്രഖ്യാപിച്ചതോടെ മലപ്പുറം നഗരസഭയിലെ 38 ാം വാർഡിലെ മൽസരത്തിന് ചൂടേറി.

മുസ്ലിം ലീഗ് , കെ.എം.സി.സി. പ്രവർത്തകനായ അബ്ദുല്‍ നാസറിന്റെ ഭാര്യ മൈമൂന നാസറാണ് ലീഗ് നേതൃത്വത്തെ വെല്ലു വിളിച്ച് ഇവിടെ അങ്കത്തിന് ഇറങ്ങിയിരിക്കുന്നത്. വാര്‍ഡില്‍ തുടര്‍ച്ചയായി ഒരേ കുടുംബത്തില്‍ നിന്നുള്ളവരെ മാത്രമേ മുസ്ലിം ലീഗ് സ്ഥാനാര്‍ഥികളായി പരിഗണിക്കുന്നുള്ളൂവെന്ന് ആരോപിച്ചാണ് ഇവർ മൽസരത്തിന് ഇറങ്ങിയത്.

എൽഡിഎഫിന്റേയും എസ്.ഡി.പി ഐയുടെയും വാർഡിലെ നിഷ്പക്ഷരായ ആളുകളുടെയും പിന്തുണതനിക്കുണ്ടെന്നും മൈമൂനയും നാസർ പറയുന്നു

കഴിഞ്ഞ തവണത്തെ കൗൺസിലർ ആയ കെകെ ഉമ്മറിന്റെ ഭാര്യ ഐഷാബിയാണ് മുസ്ലിം ലീഗിന്റെ സ്ഥാനാര്‍ഥി. ഐഷാബി രണ്ടാം തവണയാണ് ഒരേ വാര്‍ഡില്‍ മത്സരത്തിനിറങ്ങുന്നത്.

റിബൽ ഭീഷണി ഒന്നും കാര്യമല്ലെന്ന് ഐഷാബിയും ഉമ്മറും പറയുന്നു. കഴിഞ്ഞ തവണ 373 വോട്ടിന്റെ ഭൂരിപക്ഷത്തിലായിരുന്നു കെ.കെ ഉമ്മറിന്റെ ജയം.

ഇത്തവണ വിമതയുടെ പിന്‍ബലത്തില്‍ ലീഗ് ദേശീയ ജനറൽ സെക്രട്ടറിയുടെ വാർഡിൽഅട്ടിമറി വിജയം നേടാനാകുമെന്ന പ്രതീക്ഷയിലാണ് എല്‍ഡിഎഫ്. ഈ വാർഡിലെ ജയം ലീഗിന് അഭിമാന പ്രശ്നവുമാണ്.