പാലാരിവട്ടം പാലം ഞായറാഴ്ച ഗതാഗതത്തിനായി തുറന്നു കൊടുക്കും

പുനർനിർമാണം പൂർത്തിയാക്കിയ പാലാരിവട്ടം പാലം ഞായറാഴ്ച വൈകിട്ട് 4 മണിക്ക് ഗതാഗതത്തിനായി തുറന്ന് കൊടുക്കും. തെരഞ്ഞെടുപ്പ് പ്രഖ്യാപിച്ചതിനാൽ ഉദ്ഘാടന ചടങ്ങുകൾ ഒഴിവാക്കിയിട്ടുണ്ട്. പൊതുമരാമത്ത് വകുപ്പ് മന്ത്രി ജി. സുധാകരൻ പാലം സന്ദർശിക്കും (ഫയൽ ചിത്രം)

160 ദിവസം കൊണ്ടാണ് പാലാരിവട്ടം പാലത്തിന്റെ നിർമ്മാണപ്രവർത്തനങ്ങൾ പൂർത്തിയാക്കിയത്. സെപ്റ്റംബർ 28 നായിരുന്നു പാലത്തിന്റെ പുനർനിർമാണം ആരംഭിച്ചത്. എട്ടുമാസം ഇതിനായി അനുവദിച്ചു. എന്നാൽ ഡിഎംആർസിയുടെ നേതൃത്വത്തിൽ ഊരാളുങ്കൽ ലേബർ കൺസ്ട്രക്ഷൻ സൊസൈറ്റി വളരെ വേഗത്തിൽ നിർമ്മാണം പൂർത്തിയാക്കി (ഫയൽ ചിത്രം)

പാലത്തിന്റെ 19 സ്പാനുകളിൽ 17 എണ്ണവും മാറ്റിവെച്ചു. പിയറുകളും പിയർ ക്യാപ്പുകളും ബലപ്പെടുത്തി. നിർമ്മാണം ആരംഭിച്ച നാൾ മുതൽ തുടർച്ചയായ ദിവസങ്ങളിൽ പാലത്തിന്റെ ജോലികൾ നടന്നു. ഭാരപരിശോധന ഉൾപ്പെടെ പൂർത്തിയാക്കി ഡി.എം.ആർ.സി. റിപ്പോർട്ട് നൽകി. 18.71 കോടി രൂപ മുടക്കിയാണ് പാലത്തിന്റെ പുനർനിർമാണം പൂർത്തിയാക്കുന്നത് (ഫയൽ ചിത്രം)

ഉദ്ഘാടനം കഴിഞ്ഞ് രണ്ടുവർഷത്തിനുള്ളിൽ പുനർനിർമ്മിക്കേണ്ടി വന്ന പാലം സംസ്ഥാനത്തെ പൊതുമരാമത്ത് മേഖലയിലെ ഏറ്റവും വലിയ അഴിമതികളിൽ ഒന്നായാണ് കണക്കാക്കപ്പെടുന്നത് (ഫയൽ ചിത്രം)