'പഴയ ബെഡ് ഷീറ്റ് കൊണ്ടുവരൂ, പുത്തൻസഞ്ചി കൊണ്ടുപോകൂ' ശ്രദ്ധേയമായി മലപ്പുറത്തെ പ്ലാസ്റ്റിക് ബദൽമേള

'ഒരു പഴേ ബെഡ് ഷീറ്റ് കൊട്‌ത്താലേ ഓല് സഞ്ചി ണ്ടാക്കി തരൂന്ന്' മലപ്പുറം ടൗൺ ഹാളിന് മുമ്പിൽ തുടരുന്ന പ്ലാസ്റ്റിക് ബദൽ മേളയിലെ വിശേഷങ്ങൾ ആണ് മലപ്പുറം പട്ടണത്തിലെ  ഇപ്പോഴത്തെ ചൂടുള്ള വർത്തമാനം.

ശുചിത്വമിഷനും നഗരസഭയും കുടുംബശ്രീയും ചേർന്നാണ് പ്രദർശന വിപണന മേള സംഘടിപ്പിച്ചിരിക്കുന്നത്.

പ്ലാസ്റ്റിക്കിന്‍റെ ബദലുകളെ പരിചയപ്പെടുത്തുക, ആളുകളിലേക്ക് എത്തിക്കുക ഇതാണ് മേളയുടെ ലക്ഷ്യം.

ഒമ്പത് സ്റ്റാളുകൾ ഉണ്ട്. ഓരോന്നിലും ഓരോ കുടുംബശ്രീ യൂണിറ്റുകളും അവരുടെ പ്ലാസ്റ്റിക് ബദലുകൾ ആണ്

പ്ലാസ്റ്റിക്കിന്‍റെ അതേ ഈടിലും ഉറപ്പിലും പ്ലാസ്റ്റിക്കിന് പകരം ഉപയോഗിക്കാവുന്ന വൈവിധ്യമാര്‍ന്ന ഉല്‍പന്നങ്ങള്‍ പരിചയപ്പെടുത്തുക ആണ് മേളയിലൂടെ ലക്ഷ്യം വെയ്ക്കുന്നത്.

വിവിധ വലിപ്പത്തിലും നിറത്തിലുമുള്ള പേപ്പര്‍ ക്യാരി ബാഗുകളും തുണിസഞ്ചികളുമാണ് മേളയിലെ മുഖ്യ ആകര്‍ഷണം. പഴയ  ബെഡ്ഷീറ്റോ തുണിയോ നൽകിയാൽ സൗജന്യമായി സഞ്ചി നിർമ്മിച്ച് നൽകുകയും ചെയ്യും.

ഇതിന് അല്പം സമയം എടുക്കുമെന്ന് മാത്രം. മക്കരപ്പറമ്പ് വടക്കാങ്ങര ഇല കുടുംബശ്രീ യൂണിറ്റ് ആണ് സഞ്ചി ലൈവായി നിർമിച്ച് നൽകുന്നത്.

എട്ടു രൂപ മുതൽ 250 രൂപ വരെ വിലയുള്ള വിവിധ ഉത്പന്നങ്ങള്‍ മേളയിലുണ്ട്. ജൂട്ട് ബാഗുകൾ, പേഴ്‌സ്, സ്‌കൂള്‍ ബാഗുകള്‍, സൈഡ്ബാഗുകള്‍, ലഞ്ച് ബോക്‌സ് ബാഗുകള്‍, വളണ്ടിയര്‍ ടാഗുകള്‍, നിത്യോപയോഗ സഞ്ചികൾ തുടങ്ങി വൈവിധ്യമാർന്ന ഉൽപന്നങ്ങളാണ് സ്റ്റാളുകളിൽ ഉള്ളത്. പ്രദർശനം വ്യാഴാഴ്ച സമാപിക്കും