മണ്ണിനെ ഇളക്കിമറിച്ച്  ഋഷഭയാഗം; കാളപൂട്ട് ഉത്സവത്തിന് സാക്ഷിയായി ആയിരങ്ങൾ

തൃശ്ശൂർ: 'കാളപ്പൂട്ടാണിന്ന് കാളപ്പൂട്ട് ' എന്ന ഗാനത്തിന്റ അകമ്പടിയോടെയാണ് പെരിങ്ങോട്ടുകര മലയാളം സാംസ്കാരിക വേദിയുടെ ഋഷഭ യാഗത്തിന് തുടക്കമായത്.

തോന്നിയകാവ് ക്ഷേത്രത്തിനു മുൻവശത്ത് പ്രത്യേകം തയ്യാറാക്കിയ വേദിയിൽ കൃഷിമന്ത്രി വി.എസ്.സുനിൽകുമാർ ഋഷഭ യാഗത്തിന് തിരി തെളിയിച്ചു. .

തടിച്ചു കൂടിയ ആയിരങ്ങൾക്കു മുന്നിൽ അന്യം നിന്നു കൊണ്ടിരിക്കുന്ന കാളപ്പൂട്ടിന് വേദി ഒരുങ്ങി. തോന്നിയകാവ് ക്ഷേത്രത്തിന് മുൻവശത്ത് തയ്യാറാക്കിയ പ്രത്യേക കണ്ടത്തിൽ കാളകൾ മത്സരിച്ചോടി.

കാളപ്പൂട്ട് മത്സരം കൃഷി മന്ത്രി വി.എസ്.സുനിൽകുമാർ ഫ്ളാഗ് ഓഫ് ചെയ്തു. കാരണവരായ അഡ്വ.രഘുരാമപ്പണിക്കരിൽ നിന്നും മുടിയൻ കോല് ഏറ്റു വാങ്ങി അഡ്വ. ഋഷികേശ് പണിക്കർ ആദ്യ കന്ന് പൂട്ടിന് സാരഥിയായി.

പാലക്കാട് നിന്നുള്ള 120 ൽപ്പരം കന്നുകളുടെ വീറും വാശിയും ആയിരങ്ങൾക്കാണ് ആനന്ദമേകിയത്. ഇവരുടെ പരിപാലകരായി എത്തിയത് 250 ൽപരം പേരാണ്. തന്റെ ഔദ്യോഗിക തിരക്കുകൾ മാറ്റി വച്ച് മന്ത്രി മുണ്ട് മടക്കിയുടുത്ത് ചെളി നിറഞ്ഞ കണ്ടത്തിൽ ഉത്സവാവേശത്തിൽ നിന്നു .

പഴയ തലമുറക്കാരനായ കാളപ്പൂട്ട്കാരന് മീശപ്പിരിച്ച് കൊടുത്ത് ആവേശത്തിലാറാടിച്ച മന്ത്രി സുനിൽ കുമാറിനെ അദ്ദേഹം തലയിൽ കൈവച്ചനുഗ്രഹിച്ചു. തുടർന്നു നടന്ന കാളപ്പൂട്ട് മത്സരങ്ങളിൽ പാലക്കാടൻ കന്നുകൾക്കൊപ്പം അന്തിക്കാട് -താന്ന്യം പഞ്ചായത്ത്, ആവണേങ്ങാട്ട് കളരി എന്നിവിടങ്ങളിലെ കാളകളും മത്സരിച്ചോടി.