ശബരിമലയില്‍ മകരവിളക്ക് കാലത്ത് 12 ദിവസത്തെ വരുമാനം 80 കോടിയോളം രൂപ

മകരവിളക്ക് മഹോത്സവത്തിന് ഒരുങ്ങി സന്നിധാനം. പന്തളം കൊട്ടാരത്തിൽ നിന്ന് പുറപ്പെട്ട തിരുവാഭരണ ഘോഷയാത്ര നാളെ വൈകിട്ട് സന്നിധാനത്ത് എത്തും. തുടർന്നാകും മകരജ്യോതി ദർശനം.വലിയ ഭക്തജന തിരക്കുണ്ടായേക്കുമെന്ന വിലയിരുത്തലുകളെ തുടർന്ന് വിപുലമായ ഒരുക്കങ്ങളാണ് ദേവസ്വം ബോർഡ് ഒരുക്കുന്നത്.

പന്തളത്തു നിന്ന് പുറപ്പെട്ട തിരുവാഭരണ ഘോഷയാത്ര നാളെ വൈകുന്നേരം 5 മണിക്ക് ശരംകുത്തിയിൽ എത്തും. ദേവസ്വം ബോർഡ് ഭാരവാഹികളുടെ നേതൃത്വത്തിലുള്ള സ്വീകരണത്തിന് ശേഷം സന്നിധാനത്തേയ്ക്ക് ആനയിക്കും.

ആറരയ്ക്ക് അയപ്പവിഗ്രഹത്തിൽ തിരുവാഭരണം ചാർത്തിയുള്ള ദീപാരാധന. തുടർന്നാകും മകരജ്യോതി ദർശനം. 8.45 ന് ആണ് മകര സംക്രമ പൂജ. ഒരുക്കങ്ങൾ എല്ലാം പൂർത്തിയായതായി ദേവസ്വം ബോർഡ് പ്രസിഡന്റ് അഡ്വ.കെ അനന്തഗോപൻ  അറിയിച്ചു.

അതേസമയം ശബരിമലയിലെ വരുമാനത്തിൽ റെക്കോർഡ് വർധനവാണ് ഈ വർഷം ഉണ്ടായിരിക്കുന്നത്. മകരവിളക്ക് സീസണിൽ മാത്രം 78,85,65303  രൂപയുടെ വരുമാനമാണ് ലഭിച്ചത്. 

മണ്ഡലകാലത്ത് 231 കോടിയിലധികമായിരുന്നു ശബരിമലയിലെ വരുമാനം., കോവിഡ് നിയന്ത്രണങ്ങള്‍ക്ക് ശേഷമുള്ള ആദ്യ തീര്‍ത്ഥാടനകാലമായതിനാല്‍ വന്‍ ഭക്തജനതിരക്കാണ് സന്നിധാനത്ത് അനുഭവപ്പെട്ടത്.

സന്നിധാനത്ത് മാത്രം 80000 ഭക്തർക്ക് തങ്ങുന്നതിനുള്ള ക്രമീകരണങ്ങൾ ഏർപ്പെടുത്തിയതായി എഡിജിപി എം ആർ അജിത് കുമാർ പറഞ്ഞു. സന്നിധാനത്ത് മാത്രം സുരക്ഷാ മേൽനോട്ടത്തിനായി മൂന്ന് എസ്പി മാർ .നിലക്കലിലും, പമ്പയിലും, സന്നിധാനത്തുമായി ദ്രുത കർമ്മ സേനയ്ക്ക് പുറമേ 3000 പോലീസുകാരെയും വിന്യസിച്ചതായി എം ആർ അജിത്കുമാർ ന്യൂസ് 18നോട് പ്രതികരിച്ചു.അയൽ സംസ്ഥാനങ്ങളിൽ നിന്നുള്ള തീർത്ഥാടകർ ഇന്നലെ മുതൽ തന്നെ പർണ ശാലകൾകെട്ടി മകര ജ്യോതി ദർശനത്തിന് ഒരുക്കങ്ങൾ തുടങ്ങിയിട്ടുണ്ട്.