പാലക്കാട് ലഹരിമുക്തി ചികിത്സയിലായിരുന്ന യുവാവ് വെടിയേറ്റു മരിച്ചനിലയിൽ; മരിച്ചത് പഞ്ചായത്തിലെ ഇടതു സ്ഥാനാർത്ഥിയുടെ മകൻ

പാലക്കാട്: ലഹരി വിമുക്തി ചികിത്സയിലായിരുന്ന യുവാവിനെ വീടിനുള്ളിൽ വെടിയേറ്റു മരിച്ച നിലയിൽ കണ്ടെത്തി. പട്ടഞ്ചേരി സ്വദേശി അജിത്താണ് മരിച്ചത്. തദ്ദേശ തെരഞ്ഞെടുപ്പിൽ പട്ടഞ്ചേരി പഞ്ചായത്ത് പത്താം വാർഡിലെ ഇടതു സ്ഥാനാർത്ഥി കല്യാണിക്കുട്ടിയുടെ മകനാണ് അജിത്. 31 വയസായിരുന്നു.

ആത്മഹത്യയാണെന്നാണ് പൊലീസിൻ്റെ പ്രാഥമിക നിഗമനം. വെടിവയ്ക്കാന്‍ ഉപയോഗിച്ച തോക്ക് മൃതദേഹത്തിൻ്റെ സമീപത്ത് നിന്നും പൊലീസ് കണ്ടെടുത്തു.

അജിത്തിന്റെ പിതാവ് രാജന്റെ ഉടമസ്ഥതയിലുള്ളതാണ് തോക്കെന്ന് പോലിസ് പറഞ്ഞു. ചിറ്റിലഞ്ചേരിയിലെ ലഹരി വിമുക്തകേന്ദ്രത്തിൽ ചികിത്സയിലായിരുന്ന അജിത് നാലു ദിവസം മുൻപാണ് വീട്ടിൽ തിരിച്ചെത്തിയത്. വീട്ടിൽ തന്നെ കഴിഞ്ഞ അജിത് പുറത്തേയ്ക്കൊന്നും പോയിരുന്നില്ല.

സ്ഥാനാർത്ഥിയായ അമ്മ കല്യാണിക്കുട്ടിയും പിതാവ് രാജനും തെരഞ്ഞെടുപ്പ് പ്രചാരണത്തിലായിരുന്നു. പ്രചാരണം കഴിഞ്ഞ് വീട്ടിൽ മടങ്ങിയെത്തിയപ്പോഴാണ് അജിതിനെ കിടപ്പുമുറിയിൽ മരിച്ച നിലയിൽ കണ്ടെത്തിയത്. തലയിൽ വെടിയേറ്റ പാടുണ്ടായിരുന്നു.

മീനാക്ഷിപുരം പൊലീസ് കേസെടുത്ത് അന്വേഷണം ആരംഭിച്ചു. പാലക്കാട് ഡിവൈ.എസ്.പി പി ശശികുമാര്‍ സംഭവസ്ഥലം സന്ദര്‍ശിച്ചു.