ചൊരിമണലിലെ ഉള്ളിപ്പാടങ്ങൾ; 'ഉള്ളി ചലഞ്ചു'മായി ആലപ്പുഴയിലെ യുവകർഷകൻ സുജിത്ത്

ചൊരിമണലിലെ ഉള്ളിപ്പാടങ്ങളിൽ നൂറ് മേനി കൊയ്ത് ആലപ്പുഴ കഞ്ഞിക്കുഴിയിലെ കർഷകർ. പരീക്ഷണാടിസ്ഥാനത്തിലുള്ള കൃഷി വിജയത്തിലേക്ക് എത്തിയതോടെ ഉത്തരേന്ത്യൻ വിളയായ ഉള്ളി ഏക്കറുകണക്കിന് സ്ഥലത്താണ് വീണ്ടും കർഷകർ കൃഷിയിറക്കിയിരിക്കുന്നത്.

സുജിത്തെന്ന യുവകർഷകന്‍റെ പരീക്ഷണമായിരുന്നു തണുത്ത കാലാവസ്ഥ ആവശ്യമായുള്ള ഉള്ളി എങ്ങനെ കേരളത്തിൽ കൃഷി ചെയ്യാം എന്നത്. ആദ്യം ചേർത്തലയിലെ പ്രത്യാശ ക്യാൻസെൻ്ററിൻ്റെ 50 സെൻ്റ് പുരയിടത്തിൽ വിത്ത് പാകി.

സാധാരണ ഉള്ളിക്കും സവാളക്കും പൂക്കളിൽ നിന്നുള്ള വിത്ത് ഉണ്ടെങ്കിലും സുജിത്ത് മാർക്കറ്റിൽ നിന്നും നല്ലയിനം ഉള്ളി തന്നെയാണ് വാങ്ങി പാകിയത്. 3600 രൂപയുടെ ഉള്ളി വാങ്ങി. സുജിത്ത് തന്നെ കടയിൽ നിന്ന് നല്ലയിനം ഉള്ളി തിരഞ്ഞെടുത്തു.

വിത്ത് പാകിയ ഓരോ ഉള്ളിയിൽ നിന്നും പത്ത് മുതൽ 12 വരെ ഉള്ളികൾ ലഭിച്ചു. പരീക്ഷണാടിസ്ഥാനത്തിലുള്ള കൃഷി പരാജയപ്പെട്ടാൽ നഷ്ടമുണ്ടാകാതിരിക്കാൻ ഇടവിളയായി ചീര നട്ടു. ഉള്ളിയുടെ മുടക്കുമുതൽ കഴിഞ്ഞ് 15000 രൂപയോളം ലാഭം ചീരയിൽ ലഭിച്ചു. പിന്നെ ധൈര്യമായി ഉള്ളി കൃഷിയുമായി മുന്നോട്ടു പോയി

65 ദിവസത്തിനുള്ളിൽ വിളവെടുക്കാൻ ആകുമെന്നുള്ളതാണ് ഉള്ളി കൃഷിയുടെ പ്രത്യേകത. നന നന്നായി വേണം. വരമ്പൊരുക്കിയാണ് ഉള്ളി പാകിയത്. അടിവളം പ്രധാനമാണ്. ചാണകവും കോഴി വളവും ഉപയോഗിച്ചുള്ള കമ്പോസ്റ്റ് ആദ്യഘട്ടത്തിൽ വരമ്പ് ഒരുക്കുമ്പോൾ തന്നെ നൽകണം. ഒരു മാസം കഴിഞ്ഞ് കള പറിക്കുന്നതിനൊപ്പം ചാരവും കോഴി വളവും മിക്സ് ചെയ്ത് ചുവട്ടിൽ ഉപയോഗിക്കാം . മുപ്പതാം ദിവസം നൽകുന്നതാണ് നല്ലത്.

പിന്നീട് ഉള്ളി പാകമായി തുടങ്ങിയാൽ വെള്ളത്തിൻ്റെ അളവ് ക്രമേണ കുറക്കണം. അവസാന പത്ത് ദിവസം വെള്ളം നൽകേണ്ടതില്ല. ഉള്ളി അഴുകി പോകാൻ സാധ്യത ഉള്ളതിനാലാണിത്. ഉള്ളി പൂവും വിൽപ്പനക്കായി ഉപയോഗിക്കാം. ആദ്യ വിളവെടുപ്പിൽ ലഭിച്ച ഉള്ളികൾ "ഉള്ളി ചലഞ്ചിനായി " സുജിത്ത് മാറ്റിവെച്ചു.

കർഷകരെയും വീട്ടമ്മമാരെയും ആകർഷിക്കുക എന്നതാണ് ലക്ഷ്യം. ആർക്കും സുജിത്തിൻ്റെ പാടത്തെത്താം. കൃഷി പഠിക്കുകയും ഉള്ളിവിളവെടുക്കുകയും സന്തോഷസൂചകമായി അവ സ്വന്തമായി കൊണ്ടു പോകുകയും ചെയ്യാം.. സുജിത്തിനെ മാതൃകയായാക്കി നിരവധിപ്പേരാണ് ഉള്ളി കൃഷിയിലേക്ക് ഇറങ്ങിയത്.