ചായക്കട നടത്തി ഭാര്യയ്ക്കൊപ്പം ലോകം ചുറ്റിയ വിജയൻ അന്തരിച്ചു; മോഹന തനിച്ചായി

കൊച്ചി കടവന്ത്ര ഗാന്ധിനഗറിൽ ചായക്കട നടത്തി, അതിൽ നിന്നുള്ള വരുമാനം കൊണ്ട് ലോകം ചുറ്റിയ ദമ്പതികളിൽ കെ ആർ വിജയൻ അന്തരിച്ചു. 71 വയസായിരുന്നു. ഹൃദയാഘാതത്തെ തുടർന്നാണ് മരണം. റഷ്യൻ യാത്ര കഴിഞ്ഞു മടങ്ങിയെത്തി ദിവസങ്ങൾക്ക് ശേഷമാണ് മരണം.

‘ശ്രീ ബാലാജി കോഫി ഹൗസ്’ എന്ന പേരിൽ നടത്തിയിരുന്ന ചായക്കടയിലെ ചെറിയ വരുമാനത്തിൽനിന്ന് 300 രൂപ പ്രതിദിനം മാറ്റിവച്ചായിരുന്നു വിജയനും ഭാര്യ മോഹനയും ലോകയാത്രകൾ നടത്തിയത്. കഴിഞ്ഞ 16 വർഷം കൊണ്ട് ഇരുവരും 26 രാജ്യങ്ങൾ സന്ദർശിച്ചു. ഇതിനിടെ ഇവരുടെ യാത്രാപ്രേമം മാധ്യമങ്ങളിലൂടെ പുറം ലോകമറിഞ്ഞതോടെ പ്രചോദനം ഉൾക്കൊണ്ട് ലോകയാത്രകൾക്ക് ഇറങ്ങിത്തിരിച്ചവർ ഏറെയാണ്.  Photo- Twitter/ NS Madhavan

പിതാവിനൊപ്പം ചെറുപ്പത്തിൽ നടത്തിയിട്ടുള്ള ചെറുയാത്രകളിൽനിന്ന് വളർന്നപ്പോൾ രാജ്യത്തിന്റെ പലഭാഗത്തേക്കും സ്വന്തമായി യാത്ര ചെയ്തു. യാത്ര ഹരമായതോടെ രാജ്യത്തിനുള്ളിൽ തന്നെയായിരുന്നു ആദ്യകാല യാത്രകൾ. 1988ൽ ഹിമാലയൻ സന്ദർശനം. പിന്നീട് 3 പതിറ്റാണ്ടിനുള്ളിൽ യുഎസ്, ജർമനി, സ്വിറ്റ്സർലൻഡ്, ബ്രസീൽ, അർജന്റീന തുടങ്ങി 26 രാജ്യങ്ങളിൽ ഇരുവരും സന്ദർശനം നടത്തി. Photo- ANI

ഒക്ടോബർ 21 നാണ് ദമ്പതികളായ വിജയനും മോഹനയും റഷ്യയിലേക്ക് പോയത് . യാത്രക്ക് മുൻപ് ടൂറിസം മന്ത്രി മുഹമ്മദ് റിയാസ് ഇരുവരെയും കടയിലെത്തി കണ്ടിരുന്നു. ചായക്കടയിൽ നിന്നും പ്രഭാത ഭക്ഷണവും കഴിച്ച ശേഷമാണ് മന്ത്രി മടങ്ങിയത്. Photo- ANI

വിജയനും മോഹനയും. ചേർത്തലയിൽനിന്നു കൊച്ചിയിലേക്കു ജീവിതം പറിച്ചുനട്ടതോടെയാണു സഞ്ചാരം ഹരമായത്. കോവിഡ് നിയന്ത്രണങ്ങളിൽ അയവുണ്ടായതോടെയാണ് റഷ്യയിലേക്ക് അടുത്ത യാത്രയ്ക്ക് ഒരുങ്ങിയത്.

വിജയനും മോഹനയും ഫയൽ ചിത്രം . Photo- ANI