' രാഷ്ട്രീയത്തിൽ ചേരുമെന്ന വാർത്ത വ്യാജം': ഉണ്ണി മുകുന്ദൻ

രാഷ്ട്രീയത്തിൽ ചേരുമെന്ന വാർത്ത വ്യാജമാണെന്ന് നടൻ ഉണ്ണി മുകുന്ദൻ അറിയിച്ചു. സോഷ്യൽ മീഡിയ പോസ്റ്റിലൂടെയാണ് താരം ഇക്കാര്യം അറിയിച്ചത്. പാലക്കാട് നിന്നോ തിരുവനന്തപുരത്തുനിന്നോ ബിജെപി സ്ഥാനാർഥിയായി ഉണ്ണി മുകുന്ദൻ മത്സരിക്കുമെന്ന പ്രചാരണം വ്യാപകമായതോടെയാണ് വിശദീകരണവുമായി താരം രംഗത്തെത്തിയത്. ഉണ്ണി മുകുന്ദൻ പങ്കുവെച്ച് കുറിപ്പ് ചുവടെ നൽകുന്നു.

'ഞാൻ രാഷ്ട്രീയത്തിൽ ചേരുമെന്ന വാർത്ത ഇപ്പോൾ അറിഞ്ഞു. അത് വ്യാജമാണ്. ഞാൻ ഇപ്പോൾ ഗാന്ധർവ ജൂനിയർ എന്ന സിനിമയിൽ അഭിനയിച്ചുകൊണ്ടിരിക്കുകയാണ്. അതൊരു നീണട് ഷെഡ്യൂളാണ്. അതേക്കുറിച്ച് വിവരങ്ങൾ പങ്കുവെക്കാം'.

'അതിനൊപ്പം മാധ്യമങ്ങളോട് ഒരു അഭ്യർഥനയുണ്ട്. ലഭിക്കുന്ന വിവരങ്ങൾ എയർ ചെയ്യുന്നതിന് മുമ്പ് അതിലെ വസ്തുത പരിശോധിക്കാൻ ദയവായി തയ്യാറാകണം. ഇതുപോലെയുള്ള വാർത്തകൾ തുടർച്ചയായി വരുന്നത് നല്ല കാര്യമല്ല'.

'എനിക്ക് രാഷ്ട്രീയത്തോടും രാഷ്ട്രീയക്കാരോടും നല്ല മതിപ്പാണുള്ളത്. കാരണം അവർ സമൂഹവുമായി നേരിട്ടും ആഴത്തിലും ഇടപെടുന്നവരാണ്. രാഷ്ട്രീയത്തെ ഞാൻ നിസാരമായി കാണുന്നില്ല'.