കാടിറങ്ങി കാണി സമുദായക്കാർ; വ്രതശുദ്ധിയോടെ തയ്യാറാക്കിയ വനവിഭവങ്ങളുമായി അയ്യനെ കാണാനെത്തി

ശബരിമല: തിരുവനന്തപുരം ജില്ലയിലെ അഗസ്ത്യാര്‍കൂട പര്‍വത പ്രദേശങ്ങളിലെ ഉള്‍ക്കാടുകളില്‍ വസിക്കുന്നവരാണ് ഗോത്രവിഭാഗമായ കാണി സമുദായക്കാര്‍. വര്‍ഷത്തിലൊരിക്കല്‍ സന്നിധാനത്ത് എത്താന്‍ മാത്രമാണ് ഇവരില്‍ പലരും കാടിറങ്ങുന്നത്. വൃശ്ചികത്തിലെ പതിവിന് ഇക്കുറിയും മാറ്റമില്ല.

പൂര്‍വാചാര പ്രകാരം മുളംകുറ്റിയില്‍ നിറച്ച കാട്ടുചെറുതേന്‍, കാട്ടില്‍ വിളഞ്ഞ കദളിക്കുല, കരിമ്പ്, കാട്ടു കുന്തിരിക്കം, മുളയിലും ചൂരലിലും ഈറ്റയിലും നെയ്തെടുത്ത പൂക്കൂടകള്‍, പെട്ടികള്‍, വ്രതശുദ്ധിയോടെ തയ്യാറാക്കിയ വനവിഭവങ്ങൾ എന്നിവയുമായാണ് 101 അംഗ സംഘം എത്തിയത്. കാഴ്ചവസ്തുക്കള്‍ അയ്യപ്പസ്വാമിക്ക് സമര്‍പ്പിച്ച് വണങ്ങി.

ശബരിമലയിൽ എത്താന്‍ വ്രതം നോക്കുന്ന വിവിധ ഊരുകളില്‍ നിന്നുളളവര്‍ വൃശ്ചികം ഒന്നിന് കോട്ടൂര്‍ മുണ്ടണി മാടന്‍ തമ്പൂരാന്‍ ക്ഷേത്ര ട്രസ്റ്റില്‍ എത്തി രജിസ്ടര്‍ ചെയ്യും. പിന്നെ തിയതി നിശ്ചയിച്ച് ഒന്നിച്ചാണ് യാത്ര. ഇത്തവണ സംഘത്തില്‍ 30 കുട്ടികളും 7 മാളികപ്പുറങ്ങളുമെത്തി. എല്ലാ വര്‍ഷവും സന്നിധാനത്തെത്തുന്ന ഇവര്‍ക്ക് സൗജന്യമായി ദേവസ്വം ബോര്‍ഡ് ഒരു ദിവസത്തെ താമസസൗകര്യം ഒരുക്കും.

പൊലീസില്‍ നിന്ന് അനുമതികള്‍ ലഭിക്കാന്‍ വൈകിയതിനാല്‍ ദീപാരാധനയ്ക്ക് മുമ്പ് സന്നിധാനത്ത് എത്താനാകാത്തതിന്‍റെ പരിഭവവുമായാണ് ഇത്തവണ സംഘം മടങ്ങിയത്. അടുത്ത വര്‍ഷമെങ്കിലും എവിടെയും തടയാതെ കയറ്റിവിടാന്‍ സൗകര്യമൊരുക്കണമെന്ന് മാത്രമാണ് മൂപ്പന്‍ മാതിയാന്‍ കാണിയുടെ അഭ്യര്‍ഥന.