ജനസാഗരം ഒഴുകിയെത്തി; അറബിക്കടലിന്റെ തീരത്ത് പൗരത്വ നിയമത്തിനെതിരെ കോഴിക്കോട് മഹാറാലി

കോഴിക്കോട്: പൗരത്വ നിയമത്തിനെതിരെ യുഡിഎഫ് സംഘടിപ്പിച്ച മഹാറാലിയിൽ വൻജനക്കൂട്ടം. യുഡിഎഫ് റാലിയിൽ പങ്കെടുക്കാനായി കോഴിക്കോട് കടപ്പുറത്തേക്ക് ആയിരകണക്കിന് ആളുകൾ ഒഴുകിയെത്തിയ ചിത്രങ്ങൾ ഇതിനോടകം സമൂഹമാധ്യമങ്ങളിൽ വൈറലായി കഴിഞ്ഞു.

ഇത് അറബിക്കടലാണെങ്കിൽ പൗരത്വ നിയമ ഭേദഗതി ഈ കടലിന്‍റെ ആഴങ്ങളിൽ പിച്ചിച്ചീന്തിയെറിയുമെന്ന് റാലിയിൽ സംസാരിച്ച കോൺഗ്രസ് നേതാവ് കപിൽ സിബൽ പ്രഖ്യാപിച്ചു.

ഗവർണർക്കെതിരെ രൂക്ഷ വിമർശനവും കപിൽ സിബൽ ഉന്നയിച്ചു. ഗവർണർ ഭരണഘടന വായിക്കണമെന്ന് കപിൽ സിബൽ ആവശ്യപ്പെട്ടു. ഗവർണർ ഭരണഘടന വായിക്കാൻ ശ്രമിക്കണം. എന്നിട്ടും മനസിലായില്ല എങ്കിൽ താൻ അർഥം പറഞ്ഞുതരാം. ഇത്തരക്കാർക്കുള്ള ഇടമല്ല കേരളമെന്നും കപിൽ സിബൽ പറഞ്ഞു.

ആയിരക്കണക്കിനാളുകളാണ് കോഴിക്കോട് കടപ്പുറം കേന്ദ്രീകരിച്ച് നടന്ന റാലിയിൽ പങ്കെടുത്തത്. പാണക്കാട് ഹൈദരാലി ശിഹാബ് തങ്ങൾ റാലി ഉദ്ഘാടനം ചെയ്തു.

രമേശ് ചെന്നിത്തല, പികെ കുഞ്ഞാലിക്കുട്ടി എന്നിവരുൾപ്പെടെയുള്ള യുഡിഎഫ് നേതാക്കളും കാന്തപുരം അബൂബക്കർ മുസല്യർ, ജിഫ്രി മുത്തുകോയ തങ്ങൾ ഉൾപ്പെടെയുള്ള ആത്മീയ നേതാക്കളും പങ്കെടുത്തു.