അഫ്ഗാനിസ്ഥാനിൽ കീഴടങ്ങിയ ഐഎസ് തീവ്രവാദികളുടെ കൂട്ടത്തിൽ തിരുവനന്തപുരം സ്വദേശിനിയും കുടുംബവും

തിരുവനന്തപുരം: അഫ്ഗാനിസ്ഥാനിൽ കീഴടങ്ങിയ ഐഎസ് പ്രവർത്തകരിൽ തിരുവനന്തപുരം സ്വദേശിയും കുടുംബവും ഉണ്ടെന്ന് സൂചന. ആറ്റുകാൽ സ്വദേശി ബിന്ദുവിന്റെ മകൾ നിമിഷയും കുടുംബവുമാണ് കീഴടങ്ങിയവരുടെ കൂട്ടത്തിലുള്ളത്. മകളും കുടുംബവും കീഴടങ്ങിയവരുടെ കൂട്ടത്തിലുണ്ടെന്ന് സംശയിക്കുന്നതായി ബിന്ദു ചില മാധ്യമങ്ങളോട് പറഞ്ഞു.

വിദേശ വാർത്താ ചാനലുകൾ കൈമാറിയ ചിത്രം വഴിയാണ് ഇവരെ തിരിച്ചറിഞ്ഞതെന്നാണ് വിവരം. കാസർഗോട്ടു നിന്ന് ഐഎസിൽ ചേരാൻ പോയ സംഘത്തിനൊപ്പമാണ് നിമിഷയും പോയത്. നിമിഷയ്ക്കൊപ്പം ഭർത്താവ് ഈസ, മൂന്നു വയസുള്ള മകൾ ഉമ്മുക്കുൽസു എന്നിവരും ഉണ്ടായിരുന്നു.

മൂന്നു ദിവസം മുമ്പ് ഓസ്ട്രേലിയൻ വാർത്താ ഏജൻസി തന്നെ സമീപിച്ചിരുന്നുവെന്നും അവർ കൈമാറിയ കുറേ ചിത്രങ്ങളിൽ നിന്ന് മരുമകനെയും കുഞ്ഞിനെയും തിരിച്ചറിഞ്ഞതായും ബിന്ദു പറഞ്ഞതായി മാധ്യമങ്ങൾ റിപ്പോർട്ട് ചെയ്തിരിക്കുന്നു. മുഖം മറച്ച സ്ത്രീകളുടെ ചിത്രങ്ങളിൽ നിന്ന് മകളെ തിരിച്ചറിയാൻ കഴിഞ്ഞില്ലെന്നും ബിന്ദു പറഞ്ഞിട്ടുണ്ട്.

കഴിഞ്ഞ വർഷം നവംബറിലാണ് ഇവർ അവസാനമായി വിളിച്ചത്. ചെറുമകളുടെ ചിത്രം കൈമാറിയിരുന്നു. മരുമകനും സംസാരിച്ചിരുന്നു- ബിന്ദു പറഞ്ഞു.

[caption id="attachment_177745" align="alignnone" width="878"] കാസർഗോഡ് പൊയിനാച്ചി സെഞ്ചുറി ഡെന്റൽ കോളജ് വിദ്യാർഥിനിയായിരുന്ന നിമിഷ പഠനകാലത്തെ സൗഹൃദത്തിലാണ് പാലക്കാട് സ്വദേശി ബെക്സ്ൺ വിൻസെന്റിനെ വിവാഹം കഴിച്ചത്. തുടർന്ന് ഇരുവരും ഇസ്ലാം മതം സ്വീകരിക്കുകയായിരുന്നു.

സ്ത്രീകളും കുട്ടികളും ഉൾപ്പെടെ 900 ഭീകരർ അഫ്ഗാൻ സേനയ്ക്ക് മുന്നിൽ കീഴടങ്ങിയെന്നാണ് വിവരം. സംഘത്തിൽ എത്ര മലയാളികളുണ്ടെന്ന് വിവരങ്ങളില്ല. ഇവരെ കാബൂളിലേക്ക് മാറ്റിയെന്നാണ് സൂചന.