Snake | ഒരു മാസത്തിനിടെ പിടിച്ചത് പന്ത്രണ്ടോളം പാമ്പുകളെ; അധികവും മൂർഖൻ; ഭീതിയോടെ ഒരു നാട്

മലപ്പുറം: കഴിഞ്ഞ ഒരു മാസത്തിനിടെ ജനവാസ മേഖലയില്‍ നിന്ന് പിടികൂടിയത് 12 ലധികം പാമ്പുകളെ. മലപ്പുറം ജില്ലയിലാണ് വണ്ടൂരിലാണ് സംഭവം. ഇതില്‍ അധികവും മൂര്‍ഖന്‍ പാമ്പുകളാണെന്നതാണ് അപകടകരം. മഴ ശക്തമായതോടെ നാട്ടിന്‍ പുറങ്ങളില്‍ ഇഴജന്തുക്കളുടെ ശല്യം വര്‍ധിക്കുന്നതായി പരാതിയുയരുകയാണ്.

വീടിന് സമീപത്തായുള്ള കോഴിക്കൂട്, കൂട്ടിയിട്ട വിറകുകള്‍, വീടിന്റെ ഉമ്മറപ്പടിയിലിടുന്ന ചവിട്ടി, വീടിനോടു ചേര്‍ന്ന റബര്‍ത്തോട്ടം എന്നിവിടങ്ങളിലാണ് പതിവായി പാമ്പുകളെ കണ്ടുവരുന്നത്.

മഴ ശക്തമായതോടെ രാവും പകലും നടുവത്ത് സ്വദേശിയും പാമ്പുപിടുത്തക്കാരനുമായ മണികണ്ഠ കുമാറിന് തിരക്കോട് തിരക്കാണ്.

അധികവും പിടികൂടേണ്ടത് പെരുമ്പാമ്പിനേയും, മൂര്‍ഖനേയുമാണെന്ന് മണികണ്ഠ കുമാർ പറയുന്നു. പിടികൂടുന്നവയില്‍ അധികവും മൂര്‍ഖന്‍ ആണെന്നതാണ് ഏറെ അപകടകരമായ കാര്യമെന്നും ഇദ്ദേഹം പറയുന്നു.

വീടിനു സമീപം, ആരെങ്കിലും പാമ്പിനെ കണ്ടാല്‍ തങ്ങളെ വിവരമറിയിക്കണമെന്നാണ് വണ്ടൂര്‍ ട്രോമാ കെയര്‍ അംഗവും, സ്‌നേക്ക് റെസ്‌ക്യൂവറുമായ മണികണ്ഠ കുമാര്‍ പറയുന്നത്. പിടികൂടുന്ന പാമ്പടക്കമുള്ള ജീവികളെ വനപാലകര്‍ക്ക് കൈമാറുകയാണ് ഇദ്ദേഹം ചെയ്യുന്നത്. ഇവർ നിലമ്പൂർ വനമേഖലയിൽ പാമ്പിനെ തുറന്നുവിടുകയാണ് ചെയ്തത്. 

മഴക്കാലമായതോടെ ധാരാളമായി പാമ്പുകളെ കാണുന്നുണ്ടെങ്കിലും ഇതുവരെ ആർക്കും കടിയേറ്റിട്ടില്ല. വീടിനോട് ചേർന്ന് അപകടകരായ സാഹചര്യങ്ങളിൽ പാമ്പിനെ കാണുന്ന സംഭവങ്ങൾ ഇതിനോടകം നിരവധി തവണ റിപ്പോർട്ട് ചെയ്തിട്ടുണ്ട്. പാമ്പുകളെ ധാരാളമായി കാണുന്നതിനാൽ രാത്രിയിൽ പുറത്തിറങ്ങാൻ പോലും ജനങ്ങൾ ഭയപ്പെടുന്നുണ്ട്.