പത്തനംതിട്ട, കൊല്ലം ജില്ലകളിൽ കനത്ത മഴയും കാറ്റും; മരം വീണ് രണ്ട് മരണം

പത്തനംതിട്ട അടൂരിലും കൊല്ലം കൊട്ടാരക്കരയിലും ശക്തമായ കാറ്റിലും മഴയിലും വൻനാശനഷ്ടം. കാറ്റിൽ മരംവീണു രണ്ട് ജില്ലകളിലായി രണ്ടുപേർ മരിച്ചു. (ഫോട്ടോയില്‍ അടൂരിൽ മരിച്ച മനു മോഹൻ)

കൊട്ടാരക്കരയിൽ റബർമരം വീണാണ് വീട്ടമ്മ മരിച്ചത്. ഇഞ്ചക്കാട് സ്വദേശിനി ലളിതകുമാരി (62) മഴ കഴിഞ്ഞ് വീടിനു പുറത്തേക്ക് ഇറങ്ങിയപ്പോൾ രണ്ട് റബർ മരങ്ങൾ കടപുഴകി ദേഹത്തേക്ക് വീഴുകയായിരുന്നു. ഇതിനിടയിൽപ്പെട്ട ലളിതകുമാരിയെ ഉടൻതന്നെ നാട്ടുകാർ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.

അടൂരിൽ മരംവീണ് സ്കൂട്ടർ യാത്രക്കാരനും ജീവൻ‌ നഷ്ടമായി. നെല്ലിമുകൾ സ്വദേശി മനുമോഹൻ (32) ആണ് മരിച്ചത്. ചൂരക്കോട് കളത്തട്ട് ജംഗ്ഷനിലായിരുന്നു അപകടം. സ്കൂട്ടറിൽ പോവുകയായിരുന്നു മനുവിന്റെ ദേഹത്ത് മരം വീഴുകയായിരുന്നു. സംഭവസ്ഥലത്ത് തന്നെ മരണം സംഭവിച്ചു. ഈ പ്രദേശത്തെ ഗതാഗതം തടസപ്പെട്ട നിലയിലാണ്.

കനത്ത മഴയിൽ പലയിടത്തും മരങ്ങൾ കടപുഴകി വീണു. ഏനാത്ത് വീടിന്റെ മേൽക്കൂര പറന്നുപോയി. പൊലിക്കോട് പെട്രോൾ പമ്പിന്റെയും 6 വീടുകളുടെയും മേൽക്കൂര തകർന്നിട്ടുണ്ട്.

ആയൂരിൽ കശുവണ്ടി ഫാക്ടറിയുടെ മേൽക്കൂര പറന്ന് മറ്റൊരു വീടിനുമുകളിലേക്ക് വീണു. വീട്ടുകാർ അത്ഭുതകരമായി രക്ഷപ്പെട്ടു. കൊട്ടാരക്കര റെയിൽവേ സ്റ്റേഷനോട് ചേർന്ന ഭാഗത്ത് മരങ്ങൾ കടപുഴകി വീണ് ട്രെയിൻഗതാഗതവും തടസപ്പെട്ടതായി റിപ്പോർട്ടുണ്ട്.