ആദ്യ ആറ് ദിവസം വന്ദേഭാരത് എക്സ്പ്രസിന് മികച്ച വരുമാനം; കാസര്‍ഗോഡ്-തിരുവനന്തപുരം ട്രിപ്പിന് നല്ല പ്രതികരണം

കേരളത്തിന് അനുവദിച്ച തിരുവനന്തപുരം-കാസര്‍ഗോഡ് വന്ദേഭാരത് എക്സ്പ്രസ് ട്രെയിനിന്‍റെ ആദ്യ ആഴ്ചയിലെ വരുമാനം സംബന്ധിച്ച കണക്കുകള്‍ പുറത്തുവിട്ടു. ആദ്യത്തെ 6 ദിവസം കൊണ്ട് ടിക്കറ്റ് ഇനത്തില്‍ മാത്രം കോടികളുടെ വരുമാനമാണ് വന്ദേഭാരത് നേടിയിരിക്കുന്നത്. 2.7 കോടിരൂപയാണ് വന്ദേഭാരത് എക്സ്പ്രസിന്‍റെ കേരളത്തിലെ ആദ്യ ആഴ്ചയിലെ വരുമാനം.

കാസർകോട് നിന്ന് തിരുവനന്തപുരത്തേക്കുള്ള ട്രിപ്പിനാണ് യാത്രക്കാരില്‍ നിന്ന് മികച്ച പ്രതികരണം ലഭിക്കുന്നത്. ഈ റൂട്ടിലുള്ള യാത്രയ്ക്ക് വേണ്ടിയാണ് ഏറ്റവുമധികം ആളുകള്‍ ടിക്കറ്റ് ബുക്ക് ചെയ്തത്. കാസർകോട് നിന്ന് തിരുവനന്തപുരത്തേക്കുള്ള ട്രിപ്പിലൂടെ മാത്രം വന്ദേഭാരതിന് ലഭിച്ചത് 1.17 കോടി രൂപയാണ്.

ഏപ്രിൽ 28 മുതൽ മെയ് 3 വരെയുള്ള കണക്കുകളാണ് പുറത്തുവന്നത്. ശേഷം ദിവസങ്ങളിലെ കണക്ക് വരും ദിവസങ്ങളിൽ പുറത്തുവരും. ഏപ്രില്‍ 25ന്  പ്രധാനമന്ത്രി നരേന്ദ്രമോദിയാണ് വന്ദേഭാരതിന്‍റെ കന്നിയാത്ര ഫ്ലാഗ് ഓഫ് ചെയ്തത്.

തിരുവനന്തപുരം - കാസര്‍ഗോഡ് റൂട്ടിലെ ടിക്കറ്റ് വരുമാനം-ഏപ്രിൽ 28: 19.5 ലക്ഷം രൂപ, ഏപ്രിൽ 29: 20.30 ലക്ഷം, ഏപ്രിൽ 30: 20.50 ലക്ഷം,മെയ് 1: 20.1 ലക്ഷം രൂപ, മെയ് 2: 18.2 ലക്ഷം രൂപ, മെയ് 3: 18 ലക്ഷം രൂപ . തിരുവനന്തപുരം മുതൽ കാസർകോട് വരെയുള്ള പ്രതിദിന ശരാശരി കളക്ഷൻ 18 ലക്ഷം രൂപയാണ്.

വന്ദേഭാരത് കാരണം മറ്റ് ട്രെയിനുകൾ വൈകുന്നുവെന്ന വാർത്ത കഴിഞ്ഞ ദിവസം മാധ്യമങ്ങളിൽ വന്നിരുന്നു. ഇതേത്തുടർന്ന് ഇക്കാര്യത്തിൽ വിശദീകരണവുമായി രംഗത്തെത്തിയിരിക്കുകയാണ് ദക്ഷിണ റെയിൽവേ അധികൃതർ. വന്ദേ ഭാരത് കാരണം മറ്റ് ട്രെയിനുകൾ വൈകുന്നില്ലെന്നാണ് ദക്ഷിണ റെയിൽവേ വ്യക്തമാക്കുന്നത്.

വന്ദേ ഭാരത് കൃത്യസമയവും വേ​​ഗവും പാലിക്കുന്നുണ്ടെന്ന് ദക്ഷിണ റെയിൽവേ പത്രകുറിപ്പിൽ വ്യക്തമാക്കുന്നു. വന്ദേ ഭാരത് തിരുവനന്തപുരത്തും കാസർകോടും നിന്ന് പുറപ്പെടുന്നതും എത്തുന്നതും കൃത്യസമയത്ത് തന്നെയാണ്. ട്രയൽ റണ്ണിലെ സമയം സർവീസ് റണ്ണുമായി താരതമ്യം ചെയ്യാനാവില്ലെന്നും റെയിൽവേ വ്യക്തമാക്കി.