ഗൃഹപ്രവേശം നടക്കേണ്ട വീട്ടിലേക്ക് എത്തിയത് ചേതനയറ്റ ശരീരങ്ങൾ; രഞ്ജിത്തിനും ഇന്ദുലക്ഷ്മിക്കും വൈഷ്ണവിനും കണ്ണീരോടെ വിട

നേപ്പാളിൽ മരിച്ച കോഴിക്കോട് കുന്ദമംഗലം സ്വദേശികളായ രഞ്ജിത്തിന്റേയും ഭാര്യ ഇന്ദുലക്ഷ്മിയുടേയും മകൻ വൈഷ്ണവിനേറെയും മൃതദേഹങ്ങൾ സംസ്കരിച്ചു. മകൻ മാധവാണ് ചിതയ്ക്ക് തീ കൊളുത്തിയത്.

കരിപ്പൂർ അന്താരാഷ്ട്ര വിമാനത്താവളത്തിൽ ഉച്ചയ്ക് 12.30 ഓടെ എത്തിയ മൃതദേഹങ്ങൾ  മൊകവൂരിൽ രഞ്ജിത്ത് നിർമിക്കുന്ന പുതിയ വീട്ടിലേക്കാണ്  ആദ്യമെത്തിച്ചത്.

മന്ത്രി എ.കെ. ശശീന്ദ്രൻ, ജില്ലാ കളക്ടർ സാംബശിവ റാവു, എം.കെ രാഘവൻ എം.പി. തുടങ്ങിയവർ അനുഗമിച്ചു. 

രഞ്ജിത്തിന്റേയും ഇന്ദുവിന്റെയും സ്വപ്നമായിരുന്ന വീടിന്റെ പണി അവസാന ഘട്ടത്തിലായിരുന്നു. ഉടൻ ഗൃഹപ്രവേശനം നടത്തണമെന്ന് തീരുമാനിച്ചിരിക്കുമ്പോഴായിരുന്നു ദുരന്തം.

രഞ്ജിത്തിനേയും ഇന്ദുലക്ഷ്മിയേയും വൈഷ്ണവിനെയും ഒരുനോക്ക് കാണാൻ വൻ ജനാവലി തന്നെയുണ്ടായിരുന്നു. 

ആളൊഴിഞ്ഞ് അവസാനനിമിഷമാണ് മാധവിനെ മൃതദേഹങ്ങൾ കാണിച്ചത്. ഇനിയവരെ ഒരിക്കലും കാണാൻ കഴിയില്ലെന്ന് തിരിച്ചറിഞ്ഞ നിമിഷം മാധവ് പൊട്ടിക്കരഞ്ഞു.

അതുവരെ നിശബ്ദരായിരുന്ന ആൾക്കൂട്ടത്തിന് ഒപ്പം വിതുമ്പുകയല്ലാതെ മറ്റൊന്നും ചെയ്യാനില്ലായിരുന്നു.  

പിന്നീട് കുന്നമംഗലത്ത് പൊതുദർശനം. അതു കഴിഞ്ഞ് രഞ്ജിത്തിന്റെ തറവാട്ടിലേക്ക്.

തെക്കേപ്പറമ്പിൽ ഇന്ദുവിനും രഞ്ജിത്തിനും ഒരുമിച്ചായിരുന്നു ചിത. തൊട്ടടുത്ത് മകൻ വൈഷ്ണവിനും അന്ത്യവിശ്രമം.

അച്ഛന്റെയും അമ്മയുടെയും ചിതയ്ക്ക് ആറ് വയസുകാരൻ മാധവ് തീ കൊളുത്തി.

ദുഃഖം തളം കെട്ടി നിന്ന വീട്ടിൽ മൂവരെയും അവസാനമായി കാണാനെത്തിയവർ പരസ്പരം ആശ്വസിപ്പിക്കാൻ പോലുമാവാതെ നിസഹായരായി നോക്കി നിന്നു.

അനുജത്തിയുടെ വിവാഹം കഴിഞ്ഞ് വീട്ടിൽ അച്ഛനും അമ്മയും തനിച്ചായതോടെ രണ്ടര വർഷം മുൻപാണു മൊകവൂരിലേക്ക് ഇന്ദുലക്ഷ്മിയും കുടുംബവും താമസം മാറ്റിയത്.

വീടിനടുത്തുള്ള കാരന്നൂർ സഹകരണ ബാങ്കിൽ ഇന്ദുവിനു ജോലി ലഭിച്ചതും ആയിടെയായിരുന്നു.

തറവാടിനോടു ചേർന്ന് ഇന്ദുവിനു വിഹിതമായി കിട്ടിയ സ്ഥലത്ത്  2018 സെപ്റ്റംബറിൽ ആരംഭിച്ച വീടു പണി അവസാനഘട്ടത്തിലാണ്. പെട്ടന്നു തന്നെ  ഗൃഹപ്രവേശനം നടത്താനും പദ്ധതിയുണ്ടായിരുന്നു.