പാലക്കാട് ഗോപാലപുരം RT0 ചെക്ക് പോസ്റ്റിൽ വിജിലൻസ് നടത്തിയ മിന്നൽ പരിശോധനയിൽ 28000 രൂപ കൈക്കൂലി പിടിച്ചു. ഇന്നലെ രാത്രി നടത്തിയ പരിശോധനയിൽ ഉദ്യോഗസ്ഥർ ചരക്കു വാഹനങ്ങളിൽ നിന്നും പിരിച്ചെടുത്ത പണമാണ് പിടിച്ചെടുത്തത്. പിരിച്ചെടുത്ത പണം ചെക്ക് പോസ്റ്റ് ഓഫീസിന് പുറകിൽ ഇട്ടിരിരുന്ന ഒരു പ്ലാസ്റ്റിക് ഡപ്പയിലേക്കാണ് മാറ്റിയിരുന്നത്. നിശ്ചിത ഇടവേളകളിലായി നൂറിന്റെയും 500 ന്റെയും കെട്ടുകളാക്കിയാണ് പണം ഡപ്പയിലേക്ക് മാറ്റിയിരുന്നത്. ഇതിനിടെയാണ് വിജിലൻസ് റെയ്ഡ് നടത്തിയത്. സംഭവത്തിൽ അസിസ്റ്റന്റ് മോട്ടോർ വെഹിക്കിൾ ഇൻസ്പെക്ടർമാരായ ദിലീപ്, സുനിൽ, ഓഫീസ് അസിസ്റ്റൻറ് വിമൽ എന്നിവർക്കെതിരെ വിജിലൻസ് നടപടിയ്ക്ക് ശുപാർശ ചെയ്തു. വിജിലൻസ് ഇൻസ്പെക്ടർ എം ശശിധരൻ റെയ്ഡിന് നേതൃത്വം നൽകി.
