Balabhaskar death | ബാലഭാസ്കറിന്റെ അപകട മരണം; സി.ബി.ഐ ഭാര്യ ലക്ഷ്മിയുടെ മൊഴിയെടുത്തു

balu തിരുവനന്തപുരം: പ്രശസ്ത വയലിനിസ്റ്റ് ബാലഭാസ്കറിന്റെ അപകട മരണവുമായി ബന്ധപ്പെട്ട് ഭാര്യ ലക്ഷ്മിയിൽനിന്നും സി.ബി.ഐ. സംഘം മൊഴിയെടുത്തു. തിരുവനന്തപുരത്തെ വീട്ടിൽ ഡിവൈ.എസ്.പി അനന്തകൃഷ്ണന്റെ നേതൃത്വത്തിലുള്ള സി.ബി.ഐ. സംഘമാണ് ലക്ഷ്മിയുടെ മൊഴി രേഖപ്പെടുത്തുന്നത്.

ചൊവ്വാഴ്ച വൈകിട്ട് അഞ്ചരയോടെ എത്തിയ സി.ബി.ഐ. സംഘം രാത്രി എട്ടു മണിയോടെയാണ് മടങ്ങിയത്.  ലോക്കൽ പൊലീസും ക്രൈംബ്രാഞ്ചും അന്വേഷിച്ച കേസ് ഏതാനും ദിവസങ്ങൾക്ക് മുൻപാണ് സി.ബി.ഐ ഏറ്റെടുത്തത്.

കഴിഞ്ഞ ദിവസം കോടതിയിൽ എഫ്.ഐആർ സമർപ്പിച്ചിരുന്നു. ഇതിനു പിന്നാലെയാണ് ബാലഭാസ്കറിന്റെ ഭാര്യയുടെ മൊഴി രേഖപ്പെടുത്താൻ സി.ബി.ഐ സംഘമെത്തിയത്.

തിരുവനന്തപുരത്തെ വീട്ടിലേക്ക് വരുന്നതിനിടെ 2018 സെപ്റ്റംബർ 25-ന് പുലർച്ചെ പള്ളിപ്പുറത്ത് വെച്ചാണ് ബാലഭാസ്കറും കുടുംബവും സഞ്ചരിച്ച കാർ അപകടത്തിൽപ്പെട്ടത്. മകൾ തേജസ്വിനി ബാല തൽക്ഷണം മരിച്ചു. ബാലഭാസ്കർ തിരുവനന്തപുരത്തെ ആശുപത്രിയിൽ ചികിത്സിയിലിരിക്കെ ഒക്ടോബർ രണ്ടിനും മരിച്ചു.

ബാലഭാസ്കറിന്റെ മരണത്തിനു പിന്നാലെ മാനേജറായ പ്രകാശൻ തമ്പിയും വിഷ്ണു സോമസുന്ദരം ഉൾപ്പെടെയുള്ളവർ സ്വർണക്കടത്ത് കേസിൽ പിടിയിലായി. ഇതോടെ ബാലഭാസ്കറിന്റെ മരണം സംബന്ധിച്ച ദുരൂഹതകളും ശക്തമായി.

അപകട മരണമെന്നായിരുന്നു ലോക്കൽ പൊലീസിന്റെയും ക്രൈംബ്രാഞ്ചിന്റെയും കണ്ടെത്തൽ.

ബാലഭാസ്കറിന്റെ കാറിന് പിന്നാലെയുണ്ടായിരുന്ന കെ.എസ്.ആർ.ടി.സി ബസ് ഡ്രൈവറുടെ മൊഴിയുടെ അടിസ്ഥാനത്തിലാണ് പൊലീസ് കേസ് അവസാനിപ്പിച്ചത്. എന്നാൽ ഈ ഡ്രൈവർ യു.എ.ഇ കോൺസുലേറ്റ് സഹായത്തോടെ യു.എ.ഇയിൽ ജോലി നേടിയെന്ന വെളിപ്പെടുത്തലും അടുത്തിടെയുണ്ടായി.

നയതന്ത്ര ബാഗേജ് വഴിയുള്ള സ്വർണക്കടത്ത് വിവാദത്തിന്റെ പശ്ചാത്തലത്തിൽ ഈ ആരോപണങ്ങളും സി.ബി.ഐ പരിശോധിക്കുമെന്നാണ് സൂചന.