മാവോയിസ്റ്റ് പരിശീലനത്തിന്റെ കൂടുതൽ ദൃശ്യങ്ങൾ പുറത്ത്; ആക്രമണ പദ്ധതിയുടെ കുറിപ്പും പുറത്ത്

പാലക്കാട്: അട്ടപ്പാടി മഞ്ചിക്കണ്ടി വനത്തിൽ കൊല്ലപ്പെട്ടവർക്ക് മാവോയിസ്റ്റ് നേതാവ് ദീപക് പരിശീലനം നൽകുന്നതിന്റെ ദൃശ്യങ്ങൾ പൊലീസ് പുറത്തുവിട്ടു.

മാവോയിസ്റ്റ് ഏറ്റുമുട്ടൽ നടന്ന അട്ടപ്പാടി മഞ്ചിക്കണ്ടി വനമേഖലയിൽ നിന്നും കണ്ടെടുത്ത പെൻഡ്രൈവിൽ നിന്നുമാണ് ദൃശ്യങ്ങൾ ലഭിച്ചത്. ഇതോടൊപ്പം വിവിധ ഭൂപ്രകൃതികളിൽ ആക്രമണങ്ങൾ നടത്തേണ്ടത് എങ്ങനെയാണെന്ന് വിശദീകരിയ്ക്കുന്ന മാവോയിസ്റ്റ് കുറിപ്പും പൊലീസിന് ലഭിച്ചു.

മാവോയിസ്റ്റ് നേതാവ് ദീപക് Ak 47 തോക്കുപയോഗിച്ച് വനത്തിനുള്ളിൽ പരിശീലനം നൽകുന്നതിന്റെ ദൃശ്യങ്ങളാണ് പൊലീസ് പുറത്ത് വിട്ടത്. മഞ്ചിക്കണ്ടി വനമേഖലയിൽ കൊല്ലപ്പെട്ട നാലു മാവോയിസ്റ്റുകൾ ഉൾപ്പടെ പരിശീലനം നേടിയിട്ടുണ്ടെന്ന് പൊലീസ് പറയുന്നു. ചത്തീസ്ഗഡ് സ്വദേശിയെന്ന് കരുതപ്പെടുന്ന ദീപക്, മാവോയിസ്റ്റുകൾക്ക് ആയുധ പരിശീലനം നൽകുന്നതിൽ പ്രധാനിയാണ്.

മഞ്ചിക്കണ്ടി വനമേഖലയിൽ നടന്ന എറ്റുമുട്ടലിൽ ദീപക്കും പങ്കെടുത്തിട്ടുണ്ടെന്നാണ് പൊലീസ് പറയുന്നത്. ഏറ്റുമുട്ടലിൽ ദീപക്കിന് പരിക്കേറ്റിട്ടുണ്ടെന്നും ഇയാൾക്കായി തിരച്ചിൽ തുടരുകയാണെന്നും പൊലീസ് വ്യക്തമാക്കുന്നു.

ഇതോടൊപ്പം ആക്രമണ പദ്ധതികളെക്കുറിച്ച് വിശദീകരിയ്ക്കുന്ന മാവോയിസ്റ്റ് കുറിപ്പും പൊലീസ് പുറത്തുവിട്ടു. വിവിധ ഭൂപ്രകൃതിയ്ക്കനുസരിച്ച് എങ്ങനെ അക്രമണം നടത്തണം എന്നത് ഹിന്ദിയിൽ വിശദീകരിയ്ക്കുന്ന കുറിപ്പാണ് ഇപ്പോൾ പുറത്ത് വന്നിട്ടുള്ളത്.

ചെരിവുള്ള പ്രദേശങ്ങളിൽ, സമതലങ്ങളിൽ, നദികളിൽ എങ്ങനെയാവണം ആക്രമണം നടത്തേണ്ടത് എന്നതാണ് കുറിപ്പിൽ വിശദീകരിയ്ക്കുന്നത്.