പെരിയാറിൽ രാസമാലിന്യത്തിൻ്റെ അളവ് അപകടകരം: ഖരമാലിന്യം 25 ഇരട്ടി; റിപ്പോർട്ട്

കൊച്ചി: പെരിയാറിൽ അലിഞ്ഞു ചേർന്നിട്ടുള്ള ഖരമാലിന്യം, മഗ്നീഷ്യം, ക്ലോറൈഡ്, സൾഫേറ്റ് എന്നിവ അനുവദനീയമായ അളവിലും വളരെ കൂടുതലാണെന്ന് ജലവിഭവ വകുപ്പിൻ്റെ ഫീൽഡ് സ്റ്റഡി സർക്കിൾ (തൃശ്ശൂർ )ലാബിൽ നടത്തിയ പരിശോധനയിൽ കണ്ടെത്തി. ഏലൂർ പാതാളം റെഗുലേറ്റർ ബ്രിഡ്ജിന്റെ ഷട്ടറുകളുടെ മേൽത്തട്ടിലെയും താഴ്ത്തട്ടിലെയും ജലത്തിന്റെ 7 സാമ്പിളുകളിലാണ് പഠനം നടത്തിയത്.

വെള്ളത്തിൽ അലിഞ്ഞിട്ടുള്ള ഖരമാലിന്യം ( ടി ഡി എസ് ) സ്വീകാര്യമായ പരിധിയുടെ 25 ഇരട്ടിയാണ്. ക്ലോറൈഡ് 35 ഇരട്ടിയാണ്. ഒരു സാമ്പിളിൽ വെള്ളത്തിൽ അലിഞ്ഞിട്ടുള്ള ഓക്സിജന്റെ (ഡി ഒ) അളവ് പൂജ്യം ആണ്. ഈ കണ്ടെത്തലുകൾ മേൽത്തട്ടിൽ മലിനീകരണ വസ്തുക്കളുടെ സാന്നിധ്യം വ്യക്തമായി സൂചിപ്പിക്കുന്നതാണ്.

ഘന ലോഹങ്ങളുടെ സാന്നിധ്യം കണ്ടെത്തുന്നതിനു കൂടുതൽ പഠനം ആവശ്യമാണെന്നും റിപ്പോർട്ട് വ്യക്തമാക്കുന്നു. നദിയുടെ ഇടതു, വലുതുകരകളോടു ചേർന്നും നടുവിലും ഉള്ള ഷട്ടറുകളുടെ ഇരുവശങ്ങളിൽ നിന്നുമാണ് ഏപ്രിൽ 23-ന് സാംപിളുകൾ ശേഖരിച്ചത് .

വലതുകരയോട് (എടയാർ ) ചേർന്നുള്ള ഭാഗങ്ങളിലാണ് മാലിനീകരണം സംഭവിക്കുന്നത്. കൂടുതൽ വിവരങ്ങൾ ശേഖരിച്ചാൽ മാത്രമേ നദിയുടെ നീരൊഴുക്കിന്റെ ഗുണനിലവാരത്തെ കുറിച്ച് നിർണായകമായ വിലയിരുത്തൽ നടത്താൻ കഴിയു എന്ന് സൂപ്രണ്ടിങ് എൻജിനീയർ തയ്യാറാക്കിയ റിപ്പോർട്ട് ചൂണ്ടിക്കാണിക്കുന്നു.

പെരിയാർ മലിനീകരണവുമായി ബന്ധപ്പെട്ട് ഹൈക്കോടതി സ്വമേധയാ കേസ് എടുത്തതിൻ്റെ അടിസ്ഥാനത്തിൽ മലിനീകരണ നിയന്ത്രണ ബോർഡ് പരിശോധന നടത്തിയിരുന്നു. അതുകൂടാതെ ജലവിഭവ വകുപ്പും അവരുടേതായ പരിശോധന നടത്തിയതിൻ്റെ ഫലമാണ് ഇപ്പോൾ പുറത്തുവന്നിരിക്കുന്നത്.