ലോക്ക് ഡൗണിൽ പെരിയാറിന്റെ നിറമെന്ത്..? 

ലോക്ക്ഡൗൺ കാലത്ത് വ്യവസായ ശാലകൾ അടഞ്ഞു കിടക്കുന്നത് കൊണ്ട് തന്നെ പരിസ്ഥിതി മലിനീകരണത്തിൽ കുറവ് വന്നിട്ടുണ്ടാകുമെന്ന ചർച്ചകൾ വളരെ സജീവമാണ്.

എന്നാൽ, ലോക്ക്ഡൗൺ ആരംഭിച്ച അന്നുമുതൽ തുടർച്ചയായി വ്യവസായമാലിന്യം ഒഴുക്കിവിട്ട് പെരിയാർ കൂടുതൽ മലിനീകരിക്കപ്പെട്ടിരിക്കുകയാണ് എന്നതാണ് സത്യം.

പെരിയാർ എത്രയോ കാലമായി പല നിറങ്ങളിൽ ഒഴുകുന്നു. ഓരോ നിറവും തീരത്തെ ഓരോ കമ്പനികളുടെയും മാലിന്യമാണെന്ന് നാട്ടുകാരും പരിസ്ഥിതി പ്രവർത്തകരും പറയുന്നു.

ഈ ലോക്ക്ഡൗൺ കാലത്ത് ഗംഗാനദി പോലും അതിന്റെ തെളിമ വീണ്ടെടുത്തുവെന്നാണ് പറയുന്നത്. എന്നാൽ പെരിയാറിനു ഒരു മാറ്റവുമില്ല. കമ്പനികൾ പ്രവർത്തിക്കുന്നില്ലങ്കിലും മാലിന്യസംഭരണികളിൽ നിന്നുള്ള ഒഴുക്കിനു കുറവില്ല.

ഇപ്പോള്‍ കറുപ്പ് നിറത്തിലാണ് ഇവിടെ പെരിയാറിന്റെ ഒഴുക്ക്. മുമ്പ് രാത്രിയുടെ മറവിലായിരുന്നു മാലിന്യം ഒഴുക്കിയിരുന്നതെങ്കില്‍ ഇപ്പോള്‍ രാത്രിയോ പകലോ എന്ന വ്യത്യാസമില്ല. ലോക്ക്ഡൌണായതോടെ മാലിന്യമൊഴുക്കും കൂടി. പാതാളം ബണ്ടിന് താഴെ നാലുതവണയാണ് മത്സ്യങ്ങൾ ചത്ത് പൊങ്ങിയത്.

കഴിഞ്ഞ രണ്ടാഴ്ചയിലേറെയായി അതിരൂക്ഷമായ മലിനീകരണം തുടരുമ്പോഴും ഒരു പരിശോധനകളും മലീനീകരണ നിയന്ത്രണ ബോര്‍ഡിന്റെ ഭാഗത്തുനിന്ന് ഉണ്ടാകുന്നില്ല. പെരിയാറിനോട് അനുബന്ധിച്ചുള്ള കുടിവെള്ള സ്രോതസുകളിലേക്കും രാസമാലിന്യങ്ങള്‍ കലരാനുള്ള സാധ്യത കൂടുതലാണ്.

പെരിയാറിന്റെ തീരത്ത് മത്സ്യബന്ധനം നടത്തി ഉപജീവനം നടത്തുന്ന നൂറുകണക്കിന് വരുന്ന മത്സ്യതൊഴിലാളികളുടെ തൊഴിലിനെയും പെരിയാര്‍ മലിനീകരണം ദോഷകരമായി ബാധിക്കുന്നുണ്ട്.