പ്രതിഷേധത്തിന്റെ പുതിയ മുഖം; വാട്സാപ്പ് ഗ്രൂപ്പിൽനിന്ന് പുറത്തേക്ക്; അവഗണനയ്ക്കെതിരെ മോട്ടോർവാഹനവകുപ്പിലെ ജീവനക്കാർ

തിരുവനന്തപുരം: മോട്ടോർ വാഹനവകുപ്പിൽ ഗസറ്റഡ് ഓഫീസർമാർ അവഗണിക്കുന്നതിൽ പ്രതിഷേധിച്ച് ഒരു വിഭാഗം മിനിസ്റ്റീരിയൽ സ്റ്റാഫ് ജീവനക്കാർ ഔദ്യോഗിക വാട്സാപ്പ് ഗ്രൂപ്പിൽനിന്ന് കൂട്ടത്തോടെ പുറത്തുപോയി. കേരള മോട്ടോർ വെഹിക്കിൾസ് ഡിപ്പാർട്ട്മെന്‍റ് സ്റ്റാഫ് അസോസിയേഷന്‍റെ നേതൃത്വത്തിലാണ് ബഹിഷ്കരണ സമരത്തിന് ആഹ്വാനം നൽകിയത്.

ഇന്ന് ഉച്ചയ്ക്ക് രണ്ടുമണിയോടെയാണ് വാട്സാപ്പ് ഗ്രൂപ്പുകളിൽനിന്ന് ലെഫ്റ്റ് ആകണമെന്നാണ് കേരള മോട്ടോർ വെഹിക്കിൾസ് ഡിപ്പാർട്ട്മെന്‍റ് സ്റ്റാഫ് അസോസിയേഷൻ നേതൃത്വം നിർദേശം നൽകിയത്. വൈകാതെ തന്നെ ജീവനക്കാർ കൂട്ടത്തോടെ വാട്സാപ്പ് ഗ്രൂപ്പുകളിൽനിന്ന് ഒഴിവായിത്തുടങ്ങി.

ഇക്കഴിഞ്ഞ ഡിസംബർ ഏഴിന് ഗതാഗത പ്രിൻസിപ്പൽ സെക്രട്ടറിയുടെ ഓഫീസിൽ ചേർന്ന ഉന്നത ഉദ്യോഗസ്ഥരുടെ സംഘടനാ ഭാരവാഹികളുടെ യോഗവും അതിലെ തീരുമാനങ്ങളുമാണ് ഇപ്പോൾ പ്രതിഷേധത്തിന് ഇടയാക്കിയിരിക്കുന്നത്.

മിനിസ്റ്റീരിയൽ ജീവനക്കാരോ സംഘടനാ പ്രതിനിധികളെ പങ്കെടുക്കാതിരുന്ന യോഗത്തിൽ അവരെ സാരമായി ബാധിക്കുന്ന തീരുമാനങ്ങൾ കൈക്കൊണ്ടിരുന്നു. വകുപ്പിലെ സാങ്കേതിക ജീവനക്കാരുടെ സംഘടന ഇടപെട്ട് സ്പെഷ്യൽ റൂൾ ഭേദഗതി ചെയ്യാനുള്ള നീക്കം നടത്തി. ഇത് മിനിസ്റ്റീരിയൽ ജീവനക്കാരുടെ പ്രൊമോഷൻ സാധ്യതയെ സാരമായി ബാധിക്കുമെന്നാണ് വിലയിരുത്തുന്നത്.

കൂടാതെ ഫയലിൽ കാലതാമസം വരുത്തുന്ന ജീവനക്കാരെ പിരിച്ചുവിടുന്ന കാര്യം കേരളത്തിലാദ്യമായി മോട്ടോർ വാഹന വകുപ്പിൽ നടപ്പിലാക്കുന്നതിനുള്ള സാധ്യതകൾ പരിശോധിക്കാനും യോഗത്തിൽ തീരുമാനിച്ചു. ഇത് ഓഫീസ് അറ്റന്‍ഡന്‍റ് മുതൽ സീനിയർ സൂപ്രണ്ട് വരെയുള്ള മിനിസ്റ്റീരിയൽ ജീവനക്കാരെ കൂട്ടത്തോടെ പിരിച്ചുവിടാനുള്ള നീക്കത്തിന്‍റെ ഭാഗമാണെന്നും വാട്സാപ്പ് ബഹിഷ്ക്കരണം നടത്തുന്ന ജീവനക്കാർ ആരോപിക്കുന്നു.

ഒപ്പം ജോലി ചെയ്യുന്ന ഗസ്റ്റഡ് റാങ്കിലുള്ള ഉന്നത ഉദ്യോഗസ്ഥർ തങ്ങളെ പിരിച്ചുവിടാനുള്ള നീക്കം നടത്തുന്നത് ഞെട്ടിക്കുന്നതും ആശങ്കപ്പെടുത്തുന്നതുമാണെന്ന് കേരള മോട്ടോർ വെഹിക്കിൾസ് ഡിപ്പാർട്ട്മെന്‍റ് സ്റ്റാഫ് അസോസിയേഷൻ വ്യക്തമാക്കുന്നു.