Yashwant Sinha| രാഷ്ട്രപതി തെരഞ്ഞെടുപ്പ്; യശ്വന്ത് സിൻഹയുടെ പ്രചരണത്തിന് ഇന്ന് കേരളത്തിൽ തുടക്കം

തിരുവനന്തപുരം: പ്രതിപക്ഷ പാർട്ടികളുടെ രാഷ്ട്രപതി സ്ഥാനാർഥി യശ്വന്ത് സിൻഹയുടെ (Yashwant Sinha) പ്രചരണത്തിന് ഇന്ന് കേരളത്തിൽ  തുടക്കം. എൽ.ഡി.എഫ്, യു.ഡി.എഫ് ജനപ്രതിനിധികളോട് വോട്ട് അഭ്യർഥിക്കും. നിയമസഭാ മന്ദിരത്തിലെ ശങ്കരനാരായണൻ തമ്പി ലോഞ്ചിലാണ് കൂടിക്കാഴ്ച.

പ്രചരണത്തിനായി ഇന്നലെ രാത്രി കേരളത്തിലെത്തിയ യശ്വന്ത് സിൻഹയെ തിരുവനന്തപുരം വിമാനത്താവളത്തിൽ പ്രതിപക്ഷ നേതാവ് വി.ഡി സതീശന്റെ നേതൃത്വത്തിൽ യു.ഡി.എഫ് നേതാക്കൾ സ്വീകരിച്ചു. മാസ്ക്കറ്റ് ഹോട്ടലിൽ  വ്യവസായ മന്ത്രി പി രാജീവും സ്വീകരിച്ചു.

കേരളം ഹൃദയത്തോട് ചേർന്ന് നിൽക്കുന്ന സംസ്ഥാനമാണെന്ന് യശ്വന്ത് സിൻഹ പറഞ്ഞു. മുഴുവൻ വോട്ടും ലഭിക്കുന്ന കേരളത്തിൽ നിന്ന് പ്രചാരണം തുടങ്ങാനായതിൽ സന്തോഷമുണ്ടെന്നും  യശ്വന്ത് സിൻഹ പറഞ്ഞു. ഇന്ന് ഉച്ചയ്ക്ക് രണ്ട് മണിക്ക് എൽ.ഡി.എഫ് എംപിമാർ, എം.എൽ.എമാർ എന്നിവരുമായി കൂടിക്കാഴ്ച നടക്കും.

പിന്നീട് യു.ഡി.എഫ് പ്രതിനിധികളോട് വോട്ട് അഭ്യർഥിക്കും. രാഷ്ട്രപതി സ്ഥാനാർഥിക്ക് വൈകിട്ട് ഗാന്ധിഭവനിൽ  പൗരസ്വീകരണം നൽകും. നാളെ ചൈന്നയിലേക്ക് പോകുന്ന യശ്വന്ത് സിൻഹ തമിഴ്നാട്ടിലെ പര്യടനത്തിന് ശേഷം ഗുജറാത്ത്, കർണാടക, തെലുങ്കാന എന്നിവിടങ്ങളിലും വോട്ട് തേടും.