കോലം കത്തിയ്ക്കുന്നതിനിടെ മുണ്ടിന് തീപിടിച്ച യൂത്ത് കോൺഗ്രസ് നേതാവ് പൊള്ളലേറ്റ് ചികിത്സയിൽ

പാലക്കാട്: കോൺഗ്രസ് പ്രവർത്തകർ നരേന്ദ്രമോദിയുടെ കോലം കത്തിയ്ക്കുന്നതിനിടെ പ്രാദേശിക നേതാവിന്റെ മുണ്ടിന് തീപിടിച്ചു. പാലക്കാട്  സുൽത്താൻപേട്ടയിൽ കോൺഗ്രസ് നടത്തിയ റോഡ് ഉപരോധത്തിനിടെയാണ് സംഭവം.

പ്രതിഷേധത്തിനിടെ  പ്രധാനമന്ത്രി നരേന്ദ്രമോദിയുടെ കോലം കത്തിക്കുന്നതിന് ഇടയിലാണ് യൂത്ത് കോൺഗ്രസ് പ്രാദേശിക നേതാവും പാലക്കാട് നഗരസഭാ കൗൺസിലറുമായ പി എസ് വിബിൻ്റെ മുണ്ടിന് തീപിടിച്ചത്.

തീ പടർന്ന മുണ്ടുമായി പൊലീസുകാർക്ക് ഇടയിലേക്കാണ് നേതാവ് ഓടിക്കയറിത്. പിന്നീട് മുണ്ട് ഊരിയെറിഞ്ഞശേഷം രക്ഷനേടി. നാല് കോൺഗ്രസ് പ്രവർത്തകരുടെ വസ്ത്രങ്ങളിലും തീ പടർന്നെങ്കിലും വേഗത്തിൽ അണയ്ക്കാനായതിനാൽ അപകടം ഒഴിവായി.

വിബിന്റെ കാലിലും പുറത്തും പൊളളലേറ്റിട്ടുണ്ട്. വിബിനെ വിദഗ്ധ ചികിത്സയ്ക്കായി തൃശൂർ ജൂബിലി മിഷൻ ആശുപത്രിയിലേക്ക് മാറ്റി.

രണ്ട് പൊലീസുകാർക്കും പരുക്കേറ്റിരുന്നു. പ്രവർത്തകരെ പൊലീസ് അറസ്റ്റ് ചെയ്ത് നീക്കി.