പിങ്ക് ലെഹങ്കയിൽ തിളങ്ങി ആനന്ദ് അംബാനിയുടെ പ്രതിശ്രുതവധു; മെഹന്ദി ചിത്രങ്ങൾ വൈറൽ

റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനിയുടെയും റിലയൻസ് ഫൗണ്ടേഷൻ ചെയർപേഴ്സൺ നിത അംബാനിയുടെയും മകൻ ആനന്ദ് അംബാനിയുടെ വിവാഹ വാര്‍ത്ത സമൂഹമാധ്യമങ്ങളില്‍ ചര്‍ച്ചയാകുന്നതിനിടെ വിവാഹത്തിന് മുന്നോടിയായുള്ള മെഹന്ദി ചടങിന്‍റെ ചിത്രങ്ങള്‍ പുറത്തുവന്നു.

പിങ്ക് നിറത്തിലുള്ള ഒരു അതിമനോഹരമായ ലെഹങ്കയിലാണ് ആനന്ദ് അംബാനിയുടെ പ്രതിശ്രുതവധു മെഹന്ദി ചടങ്ങിനെത്തിയത്. പ്രശസ്ത ഡിസൈര്‍മാരായ അബി ജാനിയും സന്ദീപ് ഖോസ്‌ലയും ചേര്‍ന്നാണ് രാധികയെ അണിയിച്ചൊരുക്കിയത്. വസ്ത്രത്തിന് അനുയോജ്യമായ ആഭരണങ്ങളും രാധിക അണിഞ്ഞിരുന്നു.

ഇരുവരുടെയും വിവാഹനിശ്ചയ ചടങ്ങുകള്‍ അടുത്തിടെ രാജസ്ഥാനിലെ നാഥ് ദ്വാരയിലുള്ള ശ്രീനാഥ്ജി ക്ഷേത്രത്തിൽ നടന്നു.എൻകോർ ഹെൽത്ത് കെയർ സിഇഒ വീരേൻ മർച്ചന്റിന്റെയും ഷൈല മർച്ചന്റിന്റെയും മകളാണ് രാധിക മെർച്ചന്റ്. 

ആനന്ദും രാധികയും വർഷങ്ങളായി പരിചയക്കാരാണ്. ന്യൂയോർക്ക് യൂണിവേഴ്‌സിറ്റിയിൽ നിന്ന് ബിരുദം നേടിയ രാധിക, എൻകോർ ഹെൽത്ത്‌കെയറിൽ ബോർഡ് ഓഫ് ഡയറക്ടറായി സേവനമനുഷ്ഠിക്കുന്നു. ബിസിനസ് തിരക്കുകള്‍ക്കിടയിലും തന്‍റെ നൃത്തത്തോടുള്ള അഭിനിവേശം നിലനിര്‍ത്തുന്നതില്‍ അതീവ തല്‍പരയാണ് അവര്‍.

എട്ടു വര്‍ഷത്തോളമായി ഭരതനാട്യം അഭ്യസിക്കുന്ന രാധിക മര്‍ച്ചന്‍റിന്‍റെ അരങ്ങേറ്റം കഴിഞ്ഞ ജൂണില്‍ മുംബൈയിലെ ജിയോ വേൾഡ് സെന്‍ററിലെ ഗ്രാൻഡ് തിയേറ്ററിലാണ് നടന്നത്. സിനിമ-കായിക-വ്യവസായ രംഗത്തെ പ്രമുഖരാണ് രാധികയുടെ അരങ്ങേറ്റത്തില്‍ പങ്കെടുക്കാനെത്തിയത്. മുകേഷ് അംബാനിയും നിത അംബാനിയും ചേര്‍ന്നാണ് അന്ന് അതിഥികളെ സ്വീകരിച്ചത്.

റിലയന്‍സ് ഫൗണ്ടേഷന്‍ ചെയര്‍പേഴ്സണ്‍ നിതാ അംബാനിക്ക് ശേഷം അംബാനി കുടുംബത്തിലെത്തുന്ന രണ്ടാമത്തെ നര്‍ത്തകി കൂടിയാണ് രാധിക.