അങ്കമാലി ഡയറീസ് കാരണമായോ? ഇറച്ചി ഉപയോഗം കുറയുമ്പോഴും മലയാളികളുടെ പോർക്ക് പ്രിയം കൂടുന്നു

കൊച്ചി: 2017ൽ പുറത്തിറങ്ങിയ അങ്കമാലി ഡയറീസ് എന്ന ഹിറ്റ് ചിത്രം മലയാളികളുടെ ഭക്ഷണശീലത്തിൽ ചെറുതല്ലാത്ത സ്വാധീനം ചെലുത്തിയതായോ? കേരളത്തിലെ മൊത്തം ഇറച്ചി ഉപയോഗത്തിൽ കുറവുണ്ടായെങ്കിലും പന്നിയിറച്ചിയുടെ ( പോർക്ക്) ഉപയോഗം കൂടിയതായാണ് റിപ്പോർട്ട്.

സംസ്ഥാനത്ത് കഴിഞ്ഞ സാമ്പത്തിക വർഷം പന്നിയിറച്ചിയുടെ ഉപയോഗം 100 ലേറെ ടൺ കൂടിയതായാണ് മൃഗസംരക്ഷണ- ക്ഷീരവികസന വകുപ്പിന്റെ സാമ്പിൾ സർവേ വ്യക്തമാക്കുന്നത്.

2017-18 വർഷത്തിൽ 6880 ടൺ ഉപയോഗിച്ച സ്ഥാനത്ത് 2018-19ൽ 7110 ടൺ ഇറച്ചിയാണ് ഉപയോഗിച്ചത്.

പന്നിയിറച്ചി പ്രിയരുടെ നാടായ അങ്കമാലിയുടെ പശ്ചാത്തലത്തിൽ ചിത്രീകരിച്ച അങ്കമാലി ഡയറീസ് എന്ന സിനിമയുടെ പ്രമേയം തന്നെ പന്നിയിറച്ചി വ്യാപാരവുമായി ബന്ധപ്പെട്ട പ്രശ്നങ്ങളാണ്.

ചെമ്പൻ വിനോദിന്‍റെ തിരക്കഥയാണ് ലിജോ ജോസ് പെല്ലിശേരി സിനിമയാക്കിയത്. എൺപതിലേറെ പുതുമുഖങ്ങൾ അണിനിരന്നിരുന്ന ചിത്രത്തിലെ ഗാനങ്ങളും ഏറെ ശ്രദ്ധേയമായിരുന്നു.

എന്നാൽ സമീപവർഷങ്ങളിൽ‌ ആദ്യമായി കഴിഞ്ഞ സാമ്പത്തിക വർഷം (2018-19)മലയാളികൾ ബീഫ് കഴിക്കുന്നതിൽ പിറകോട്ടുപോയിട്ടുണ്ട്. സർവേ പ്രകാരം 2018-19 വർഷത്തിൽ 2.49 ടൺ ബീഫാണ് മലയാളികൾ കഴിച്ചത്. 2017-18 വർഷം ഇത് 2.57 ടണ്ണായിരുന്നു.

കഴിഞ്ഞ വർഷം മലയാളികൾ കഴിച്ച 2.49 ടൺ ബീഫിൽ 1.52 ലക്ഷം ടൺ കാളയിറച്ചിയാണ്. പോത്തിറച്ചി 97,051 ടണ്ണുമാണ്. മുൻ വർഷം ഇത് യഥാക്രമം 1.59 ടണ്ണും 98.440 ടണ്ണുമായിരുന്നു.

സിനിമ ഇറങ്ങിയ അതേ കാലത്ത് വടക്കേ ഇന്ത്യയിലെ ബീഫ് സംബന്ധിച്ച അക്രമങ്ങൾക്കെതിരേ കേരളത്തിൽ വ്യാപകമായി ബീഫ് ഫെസ്റ്റിവൽ സംഘടിപ്പിച്ചിരുന്നുവെന്നതും ശ്രദ്ധേയമാണ്.

ബീഫിന്റെ കാര്യത്തിൽ മാത്രമല്ല, മൊത്തം ഇറച്ചി ഉപയോഗത്തിലും (ബീഫ്, മട്ടൺ, ചിക്കൻ)കഴിഞ്ഞ സാമ്പത്തിക വർഷം കുറവുണ്ടായി.

4.57 ടൺ ഇറച്ചിയാണ് മലയാളികൾ 2018-19 വർഷം കഴിച്ചത്. 2017-18 വർഷം ഇത് 4.69 ടണ്ണായിരുന്നു.

അങ്കമാലി കൂടാതെ പാലാ, കാഞ്ഞിരപ്പള്ളി, കോതമംഗലം, ഇടുക്കി എന്നീ പ്രദേശങ്ങളിൽ മാത്രമാണ് കേരളത്തിൽ പന്നിയിറച്ചിയ്ക്ക് പ്രിയം.