അയര്‍ലന്‍ഡില്‍ മുങ്ങി മരിച്ച വിദ്യാര്‍ഥികളുടെ കുടുംബത്തെ എംവി ഗോവിന്ദന്‍ സന്ദര്‍ശിച്ചു

നോർത്തേൺ അയർലന്‍ഡില്‍ തടാകത്തിൽ മുങ്ങിമരിച്ച മലയാളി വിദ്യാർത്ഥികളുടെ കുടുംബാംഗങ്ങളെ സിപിഎം സംസ്ഥാന സെക്രട്ടറി എംവി ഗോവിന്ദന്‍ സന്ദര്‍ശിച്ചു.

കഴിഞ്ഞ വര്‍ഷം ഓഗസ്റ്റിലുണ്ടായ അപകടത്തില്‍ ജീവന്‍ നഷ്ടപ്പെട്ട റുവാൻ ജോ സൈമന്റെയും ജോസഫ് സെബാസ്റ്റ്യന്റെയും കുടുംബത്തെയാണ് ലണ്ടന്‍ഡെറി സന്ദര്‍ശനത്തിനിടെ എംവി ഗോവിന്ദന്‍ കാണാനെത്തിയത്.

കോട്ടയം സ്വദേശി സെബാസ്റ്റ്യന്‍ ജോസി (അജു)ന്റെ മകനാണ് ജോപ്പു എന്നു വിളിക്കുന്ന ജോസഫ് സെബാസ്റ്റ്യന്‍. കണ്ണൂര്‍ പയ്യാവൂര്‍ സ്വദേശി ജോഷിയുടെ മകനാണ് റുവാൻ ജോ സൈമണ്‍. എരുമേലി കൊരട്ടി കുറുവാമൂഴി ഒറ്റപ്ലാക്കല്‍ കുടുംബാംഗമാണ് മരിച്ച ജോസഫിന്റെ പിതാവ് അജു. മാതാവ് വിജി.

പയ്യാവൂർ പൊന്നുംപറമ്പത്ത് മുപ്രാപ്പള്ളിയിൽ കുടുംബാംഗമാണ് മരിച്ച റുവാന്റെ പിതാവ് ജോഷി. നോർത്തേൺ അയർലണ്ടിലെ ലണ്ടൻഡെറിയിലാണ് ഇരുവരും താമസം.തടാകത്തിലെ വെള്ളത്തിലേക്ക് ഇറങ്ങിയ റുവാൻ അപകടത്തില്‍പെടുകയും രക്ഷിക്കാൻ ശ്രമിച്ച ജോസഫും പിന്നാലെ അപകടത്തിൽപെടുകയായിരുന്നു.