മിൽമ പാൽ ഏറ്റെടുത്തില്ല; ആളുകൾക്ക് പാൽ സൗജന്യമായി നൽകി ക്ഷീരകർഷകർ

മലപ്പുറം: മിൽമ പാൽ ഏറ്റെടുക്കാത്തതിനാൽ പ്രതിസന്ധിയിലായവരാണ് നിലമ്പൂർ മൂലേപ്പാടത്തെ ക്ഷീരകർഷകർ. പക്ഷേ അവർ ചിറ്റൂരിലെ കർഷകരെ പോലെ ഒഴുക്കി കളയുക അല്ല ചെയ്തത്, പകരം അടുത്ത വീടുകളിലും കോളനികളിലും കൊണ്ട് കൊടുക്കുകയായിരുന്നു.

ഏഴ് പശുക്കളിൽ നിന്നായി മൂന്ന് നേരം കൊണ്ട് 300 ലിറ്ററോളം പാൽ കറന്നെടുക്കുന്ന വിൽസൺ അയൽവാസികൾക്ക് എല്ലാം ഒരു ലിറ്ററിലേറെ പാൽ കൊണ്ട് കൊടുക്കുകയായിരുന്നു. പാൽ ഒഴിച്ച് കളഞ്ഞ് പ്രതിഷേധിക്കുന്നതിനെ പറ്റി ആലോചിക്കാൻ പോലും വയ്യ- അദ്ദേഹം പറയുന്നു

"1200 രൂപയിലധികം ചെലവ് ഉണ്ട് പശുക്കൾക്ക് തീറ്റ നൽകാൻ തന്നെ. ഈ ദിവസങ്ങളിൽ മുന്നോട്ട് പോകുക എളുപ്പമല്ല. പാലിൽ 90 ശതമാനവും മിൽമ ആണ് ഏറ്റെടുക്കുന്നത്. ബാക്കി ഹോട്ടലുകളിൽ കൊടുക്കും. പക്ഷേ ഇപ്പൊ ഹോട്ടൽ ഒന്നും ഇല്ലല്ലോ. വലിയ പ്രതിസന്ധി തന്നെ ആണ് മുന്നിൽ. എങ്ങനെ മുന്നോട്ട് പോകും എന്നറിയില്ല. കാലിത്തീറ്റ കിട്ടാനും ആദ്യ ദിവസങ്ങളിൽ ബുദ്ധിമുട്ട് ആയിരുന്നു. ഇപ്പോൾ സാഹചര്യങ്ങൾ അല്പം മാറി-വിൽസൺ പറയുന്നു.

ക്ഷീര കർഷകയായ ഷൈനിക്ക്‌ പറയാനുണ്ടായിരുന്നത് രാവിലെ കോളനിയിൽ പാൽ കൊണ്ട് കൊടുത്തപ്പോഴുണ്ടായ അനുഭവം ആണ്. " വാതിൽക്കൽ നിന്ന് പാൽ വാങ്ങുമ്പോൾ പലർക്കും അത്ഭുതമായിരുന്നു. എല്ലാവർക്കും സന്തോഷം. നല്ല പാൽ വീടിന് പുറത്ത് ഇറങ്ങാതെ കിട്ടിയതല്ലേ. പാൽ അധികമൊന്നും എടുത്ത് വെക്കാൻ പറ്റില്ലല്ലോ. എന്തായാലും വെറുതെ ഒഴുക്കി കളയാൻ വയ്യ-ഷൈനി പറയുന്നു.

വിൽസനും ഷൈനിയുമൊക്കെ മേഖലയിലെ നിരവധി ക്ഷീര കർഷകരിൽ ചിലർ മാത്രമാണ്. കൊറോണ അടച്ചിടൽ കാലം കഴിഞ്ഞാലും ഇപ്പോഴത്തെ പ്രതിസന്ധിയിൽ നിന്നും കര കേറാൻ കഷ്ടപ്പെടേണ്ടി വരും.