മുതലാളീടെ സമയം ശരിയല്ലെന്ന് പറഞ്ഞ തൊഴിലാളിയെ പറഞ്ഞുവിട്ടു

മുതലാളിയോട് സത്യം തുറന്നു പറഞ്ഞാൽ പണി പോകും എന്ന അവസ്ഥയെക്കുറിച്ച് ചിന്തിച്ചിട്ടുണ്ടോ? എന്നാൽ അത് ചിന്തയിൽ മാത്രം ഒതുങ്ങുന്നതല്ല. സംഭവിച്ചു കൂടി കഴിഞ്ഞു. മുതലാളി മറ്റാരുമല്ല, ട്വിറ്റർ സി.ഇ.ഒ. എലോൺ മസ്ക് ആണ്. മസ്ക് ട്വിറ്റർ ഏറ്റെടുത്ത് മുതൽ ഒട്ടേറെ കാര്യങ്ങളിൽ മാറ്റം സംഭവിച്ചു. വ്യൂസിന്റെ എണ്ണമാണ് അതിലൊന്ന്. ഇത് മസ്കിന്റെ തല്പര മേഖലയാണ്

തന്റെ ട്വീറ്റുകൾക്ക് എത്ര വ്യൂസ് ലഭിച്ചു എന്ന കാര്യത്തിൽ മസ്കിനു കണിശത കൂടുതലാണെന്നും പറയപ്പെടുന്നു. ഒരു ദിവസം സ്വന്തം ട്വിറ്റർ അക്കൗണ്ട് പ്രൈവറ്റ് ആക്കി, ഒരു പ്രത്യേക തരം പരീക്ഷണവും മസ്ക് നടത്തിയിരുന്നു. തന്റെ ഓഡിയന്സിന്റെ എണ്ണം വർധിപ്പിക്കാനുള്ള ഒരു ശ്രമം ആയിരുന്നത്രേ ഇത്. എന്നാൽ ഈ സംഭവം ഒരാളുടെ പണി തെറിപ്പിക്കുന്ന സാഹചര്യത്തിലാണ് അവസാനിച്ചത് (തുടർന്ന് വായിക്കുക)

എന്നാൽ പരീക്ഷണ ശേഷവും വലിയ മാറ്റം ഏതുമുണ്ടായില്ല താനും. ശേഷം ട്വിറ്റർ ആസ്ഥാനത്ത് മസ്ക് ഒരുപറ്റം എഞ്ചിനീയർമാരെ വിളിച്ചുകൂട്ടി എങ്ങനെ തന്റെ പേജിലേക്കുള്ള എൻഗേജ്മെന്റ് കൂട്ടാം എന്നതിനെ പറ്റിയായി ചർച്ച

100 ദശലക്ഷം ഫോളോവേഴ്‌സ് ഉണ്ടായിരുന്നിട്ടും തനിക്ക് 'പതിനായിരക്കണക്കിന് ഇംപ്രഷനുകൾ മാത്രമേ ലഭിക്കുന്നുള്ളൂ' എന്നതിന്റെ കാരണമായിരുന്നു അറിയേണ്ടിയിരുന്നത്. രണ്ടു പ്രിൻസിപ്പൽ എഞ്ചിനീയർമാരായിരുന്നു അതിനു വിശദീകരണം നൽകേണ്ടിയിരുന്നത്

അവരിൽ ഒരാൾ കാരണം വിവരിച്ചു. എന്നാൽ എലോൺ മസ്‌ക് അത് പ്രതീക്ഷിച്ചതുപോലെ എടുത്തില്ല. മസ്ക് ട്വിറ്റർ ഏറ്റെടുത്തതു മുതൽ ജനപ്രീതി കുറഞ്ഞതായി പ്രിൻസിപ്പൽ എഞ്ചിനീയർ പറഞ്ഞു. ഇതിനായി ട്വിറ്റർ ഇന്റേണൽ ഡാറ്റയും, ഗൂഗിൾ ട്രെൻഡ്‌സ് ചാർട്ടും അദ്ദേഹം അവതരിപ്പിച്ചു

കഴിഞ്ഞ ഏപ്രിൽ മാസം സെർച്ച് റാങ്കിങ്ങിൽ മസ്ക് വളരെ ഉയരെയായിരുന്നു. 100 പോയിന്റ് വരെ സ്കോർ ചെയ്‌തു. എന്നാൽ ഇപ്പോൾ ഒന്പത് ആണ് മസ്കിന്റെ സ്കോർ

ഇത് പറഞ്ഞ ഉദ്യോഗസ്ഥനെ മസ്ക് ജോലിയിൽ നിന്നും പറഞ്ഞുവിട്ടു. മാത്രവുമല്ല, തന്റെ ട്വീറ്റുകൾ എത്രത്തോളം റെക്കമെന്റ് ചെയ്യപ്പെടുന്നു എന്ന് പരിശോധിക്കാൻ മറ്റു ജീവനക്കാരെ ചുമതലപ്പെടുത്തുകയും ചെയ്‌തു