മുൻനിര ആഗോള കമ്പനികളുടെ തലപ്പത്ത് എത്തിയ ഇന്ത്യൻ വംശജരായ സിഇഒമാർ ആരൊക്കെ

സത്യ നഡെല്ല- മൈക്രോസോഫ്റ്റ് സിഇഒ ആയിരുന്ന സത്യ നഡെല്ല ജോൺ തോംസണിൽ നിന്ന് മൈക്രോസോഫ്ടിന്റെ ചെയർമാൻ സ്ഥാനം ഏറ്റെടുത്തു. ഈ അധിക ഉത്തരവാദിത്തം വാഷിംഗ്ടൺ ആസ്ഥാനമായ റെഡ്മണ്ടിലെ നഡെല്ലയുടെ പങ്ക് വർദ്ധിപ്പിക്കും. എന്നാൽ ലോകത്തെ മികച്ച കമ്പനികളെ നയിക്കുന്ന നിരവധി ഇന്ത്യക്കാരിൽ ഒരാളാണ് നാഡെല്ല. ഇന്ത്യൻ വംശജരായ മറ്റ് പ്രമുഖ സിഇഒമാ‍ർ ആരൊക്കെയാണെന്ന് നോക്കാം.

സുന്ദർ പിച്ചൈ- ഗൂഗിളിന്റെ പേരന്റ് കമ്പനിയായ ആൽഫബെറ്റിന്റെ സഹസ്ഥാപകരായ ലാറി പേജും സെർജി ബ്രിനും ഡിസംബർ 3 ന് ചുമതലകളിൽ നിന്ന് പിന്മാറുന്നതായി പ്രഖ്യാപിച്ചു. ഇതിനെ തുട‍ർന്ന് സുന്ദർ പിച്ചൈ ആണ് ഇപ്പോൾ ആൽഫബെറ്റിന്റെ ചുക്കാൻ പിടിക്കുന്നത്. പിച്ചൈ 2015ലാണ് ഗൂഗിളിന്റെ സിഇഒ ആയി ചുമതലയേറ്റത്.

ഇന്ദ്ര നൂയി- ഇന്ത്യൻ അമേരിക്കൻ ബിസിനസുകാരിയായ ഇന്ദ്ര നൂയി 2006 ഒക്ടോബർ മുതൽ 2018 ഒക്ടോബർ വരെ പെപ്സികോയുടെ സിഇഒ ആയി സേവനമനുഷ്ഠിച്ചിരുന്നു. 2018 ഒക്ടോബർ മുതൽ 2019 ജനുവരി വരെ അവർ കമ്പനിയുടെ ചെയർമാനായി സേവനമനുഷ്ഠിച്ചു. നൂയി നിലവിൽ ആമസോണിലെ ഡയറക്ടർ ബോർഡ് അംഗമാണ്.

ശന്തനു നാരായണൻ- 2018 ഒക്ടോബറിൽ അഡോബ് ഇങ്ക് സിഇഒ സ്ഥാനത്തെത്തിയ വ്യക്തിയാണ് ശന്തനു. ഫൈസർ ഇൻകോർപ്പറേഷന്റെ ബോർഡ് അംഗം കൂടിയാണ് ഇദ്ദേഹം.

സഞ്ജയ് മെഹ്‌റോത്ര- സെമി കണ്ടക്ട‍ർ ബ്രാൻഡായ മൈക്രോണിന്റെ പ്രസിഡന്റും സിഇഒയുമാണ് 61കാരനായ സഞ്ജയ് മെഹ്‌റോത്ര. സാൻഡിസ്കിന്റെ സഹസ്ഥാപകനാണ് മെഹ്റോത്ര. സാൻഡിസ്കിന്റെ പ്രസിഡന്റും സിഇഒയും ആയി 27 വർഷം സേവനമനുഷ്ഠിച്ചിരുന്നു. ഇന്റൽ കോർപ്പറേഷനിൽ സീനിയർ ഡിസൈൻ എഞ്ചിനീയറായാണ് ഇദ്ദേഹം ഔദ്യോഗിക ജീവിതം ആരംഭിച്ചത്.

വിക്രം പണ്ഡിറ്റ്- ഇന്ത്യൻ-അമേരിക്കൻ ബാങ്കറും നിക്ഷേപകനുമായ വിക്രം പണ്ഡിറ്റ് 2007 ഡിസംബർ മുതൽ 2012 ഒക്ടോബർ വരെ സിറ്റി ഗ്രൂപ്പിന്റെ സിഇഒ ആയിരുന്നു. നിലവിൽ ഓറോജൻ ഗ്രൂപ്പിന്റെ ചെയർമാനും സിഇഒയുമാണ്.

ദിനേശ് പാലിവാൾ- ആഗ്രയിൽ ജനിച്ച പാലിവാൾ യുഎസിലെ സ്റ്റാംഫോർഡ് ആസ്ഥാനമായുള്ള ഹർമാന്റെയും സിഇഒയും പ്രസിഡന്റുമായിരുന്നു. പാലിവാൾ നിലവിൽ നെസ്‌ലെ, ഹർമാൻ എന്നീ കമ്പനികളിൽ ബോർഡ് അംഗമായി സേവനമനുഷ്ഠിക്കുന്നു.

നികേഷ് അറോറ നെറ്റ്‌വർക്ക് സെക്യൂരിറ്റി സൊല്യൂഷൻസ് നൽകുന്ന പാലോ ആൾട്ടോ നെറ്റ്‌വർക്ക്സിന്റെ സിഇഒയും ചെയർമാനുമാണ് ഇന്ത്യൻ വ്യവസായിയായ നികേഷ് അറോറ. 2018 ജൂണിലാണ് ഇദ്ദേഹം കമ്പനിയുടെ സിഇഒ ആയി ചുമതലയേറ്റത്. ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി വാരണാസിയിൽ നിന്ന് ബിരുദം നേടിയ ഇദ്ദേഹം സോഫ്റ്റ്ബാങ്കിലും ഗൂഗിളിലും സേവനമനുഷ്ഠിച്ചിട്ടുണ്ട്.

അജയ് ബംഗ- നിലവിൽ മാസ്റ്റർകാർഡിന്റെ എക്സിക്യൂട്ടീവ് ചെയർമാനായ പൂനെ സ്വദേശിയായ അജയ് ബംഗ നേരത്തെ കമ്പനിയുടെ സിഇഒ, പ്രസിഡന്റ്, ബോർഡ് അംഗം എന്നീ നിലകളിൽ പ്രവർത്തിച്ചിട്ടുണ്ട്. 10 വർഷമായി അദ്ദേഹം മാസ്റ്റർകാർഡിനൊപ്പം ഉണ്ട്. 59 കാരനായ ഇദ്ദേഹം തന്റെ കരിയർ നെസ്‌ലെയിലാണ് ആരംഭിച്ചത്. പിന്നീട് പെപ്‌സികോയുടെ ഭാഗമായി. ഐ.ഐ.എം-അഹമ്മദാബാദിലെ പൂർവ്വ വിദ്യാർത്ഥിയാണ് അജയ് ബംഗ.

അശോക് വെമുറി- ഐ‌ഐ‌എം അഹമ്മദാബാദ് പൂർവവിദ്യാർഥിയായ അശോക് വെമുറി കണ്ടൻറ് ഇങ്ക്, ഐഗേറ്റ് എന്നിവയുടെ സിഇഒ ആയിരുന്നു.

ഇവാൻ മെനെസസ്- ബ്രിട്ടീഷ് മൾട്ടി നാഷണൽ ആൽക്കഹോൾ കമ്പനിയായ ഡിയാജിയോ പി‌എൽ‌സിയുടെ സിഇഒയും എക്സിക്യൂട്ടീവ് ഡയറക്ടറുമായിരുന്നു ഇവാൻ മെനെസസ്. കമ്പനിയുടെ ആസ്ഥാനം ലണ്ടനിലാണ്.